ABŞ Prezidentinin milli təhlükəsizlik üzrə müşaviri Con Bolton bildirmişdir ki, Vaşinqton Kuba, Venesuela və Nikaraquaya qarşı yeni sanksiyalar tətbiq edir. O, adıçəkilən ölkələri "tiran dövlətlər üçlüyü” adlandırmışdır.

Məhdudiyyətlər Kubaya səfərlərə və pul köçürməsinə tətbiq olunur. Bir nəfər ABŞ-dan bu ölkəyə bir rüb ərzində 1000 dollardan çox pul göndərə bilməz.

Bolton həmçinin kubalı hərbçilərlə və ölkənin xüsusi xidmət orqanları ilə əlaqədə olan beş şirkətə, o cümlədən "Aerogaviota” aviaşirkərinə qarşı cərimə tədbirlərinin tətbiq olunacağını bildirmişdir. Onun dediyinə görə, ABŞ-ın sabiq Prezidenti Barak Obamanın Kuba ilə münasibətləri normallaşdırmağa yönəlmiş siyasəti Kuba rejiminin regionda zərərli ideoloji təsirinin genişlənməsinə gətirib çıxarmışdır.

Bundan əlavə, ABŞ Maliyyə Nazirliyi Venesuela Mərkəzi Bankına qarşı sanksiyalar tətbiq etmişdir. Nazirliyin mətbuat üçün məlumatında deyilir ki, məqsəd "Maduro rejiminin bankdan dövlət aktivlərini talamaq və korrupsiyaya uğramış rejim nümayəndələrinin varlanması üçün istifadə etməsinin qarşısını almaqdır”.

Maliyyə Nazirliyi həmçinin Nikaraquanın "Banco Corporativo” bankına və Nikaraqua Prezidentinin oğlu Laureano Orteqa Murilyoya qarşı cərimə tədbirləri tətbiq etmişdir. Bolton onları müvafiq olaraq "qara kassa” və "iri korrupsioner” adlandırmışdır.

Sanksiyalar ABŞ-dakı hesabların dondurulmasını nəzərdə tutur. Amerikalılara onlarla iş qurmaq qadağan edilir.