İsmayıllı Rayon Mərkəzi Xəstəxanasında dövlətin əhali üçün yaratdığı şansdan bəhrələnməyə çalışırlar. Növbəlilik əsasında hər kəs sağlamlığı ilə bağlı problemini aradan qaldırmaq üçün həkimin qəbuluna tələsir.

Rayon mərkəzi xəstəxanasının baş həkiminin müavini Abdullətif Maqsudovla söhbət zamanı bildirdi ki, fevralın 12-dən başlayaraq Prezident İlham Əliyevin tapşırığına və Səhiyyə Nazirliyinin müvafiq sərəncamına uyğun respublikamızda əhalinin tibbi müayinələrdən keçirilməsinə başlanılıb. Bununla əlaqədar rayon icra hakimiyyətinin başçısı Mirdaməd Sadıqov da fevral ayının 6-da sərəncam verib. Həmin sərəncamla tibbi müayinənin nümunəvi təşkili ilə bağlı tədbirlər müəyyənləşdirilib. RİH başçısının sədrliyi ilə komissiya yaradılıb, işçi qruplarının tərkibi müəyyənləşdirilib, qrafik tərtib edilib.

Yaradılan komissiyanın iştirakı ilə 9 fevral 2019-cu il tarixdə rayon icra hakimiyyətində keçirilən müşavirədə tibbi müayinənin əhəmiyyəti və mahiyyətindən, bu sahədə icra strukturlarının üzərinə düşən vəzifələrdən, bunun xalqa xidmətin gərəkli yolu olduğundan ətraflı bəhs edilib.

Rayon mərkəzi xəstəxanasının baş həkimi Aydın Əsədov qeyd edib ki, bütün tibb müəssisələri müayinə üçün tam hazır vəziyyətə gətirilib. Komissiyanın sədr müavini, RİH başçısının müavini Sevil Əhmədova iştirakçıları tibbi müayinə qrafiki ilə tanış edib, mayın 1-dək davam edəcək tibbi müayinə və dispanserizasiyasının yüksək səviyyədə həyata keçiriləcəyini bildirib.

Məlumat verildi ki, son günlərədək 16 min nəfərə yaxın ismayıllılı tibbi müayinə ilə bağlı müraciət edib və onlar ixtisaslı həkimlər tərəfindən müayinə ediliblər. Onlardan 435-i ambulator, 127-si stasionar, 12 nəfəri isə Bakı şəhərindəki ixtisaslaşmış sağlamlıq ocaqlarında müalicəyə cəlb olunub.

Əhalinin tibbi müayinəsi zamanı mütəşəkkilliyin təmin olunması nəzərdə tutulub. Bu məqsədlə 16 həkim məntəqəsi yaradılıb. Əsas üstünlük həkim məntəqələrinə, poliklinikalara və xəstəxanalara verilib. 18 yaşdan yuxarı 61 min 832 nəfərlik əhali kampaniya müddətində müayinə ediləcək.

Kəskin respirator xəstəlikdən əziyyət çəkənlərdən Nərmin Ələsgərova Aşağı Zərnava kəndindən gəlib. İnanır ki, həkimlərin səyləri nəticəsində tezliklə əvvəlki sağlamlığına qovuşacaq.

Arizə Həmidova Talıstan kəndindəndir. III qrup əlildir. Məqsədi ümumi müayinə olunmaqdır. Əvvəlki pulsuz tibbi müayinələrdə də yaradılan imkandan bəhrələndiyini deyir.

Hənifə Əliyeva isə əslən Laçın rayonunun Şeylanlı kəndindəndir. Məcburi köçkün kimi İsmayıllı rayonunun Qalınçaq kəndində məskunlaşıb. İnanır ki, keçirilən müayinənin nəticələrinə uyğun aparılan müalicə kömək edəcək və tezliklə sağlamlığına qovuşmaq imkanı əldə edəcək.

Əli SƏLİMOV,

"Azərbaycan”