Fizika tarixində XIX əsrin sonu bir sıra mühüm kəşflərin edilməsi ilə əlamətdardır ki, bu kəşflər bəzi fiziklərin dünyagörüşlərində elmi inqilab yaratdı. Rentgen şüalarının kəşfi məhz bunlardan biridir. 1895-ci il noyabrın 8-də alman fiziki Vilhelm Rentgen gözə görünməyən qəribə xassəli şüalar kəşf edir.

Qazların elektrik keçirməsinin və katod şüalarının tədqiqi rentgen şüalarının kəşfinə səbəb oldu. V.Rentgen seyrəldilmiş qazlardan elektrik cərəyanı keçərkən qazın işıqlanmasını öyrənirdi.

Yorulmuş alim gecə öz təcrübəsindən ayrılıb gedərkən otağın işığını söndürüb qapıdan çıxandan sonra yadına düşür ki, qurğunu cərəyandan ayırmayıb. Rentgen qaranlıqda geri qayıdarkən borudan bir az aralı qəribə mavi işıq gördükdə təəccüblənir. O, cərəyanı ayırdıqda işıqlanma kəsilir. Yenidən qoşduqda kristallar işıqlanır. Rentgen qalın kitabla borunu kristallardan ayırdıqda işıqlanma zəifləmirdi. O, müəyyən edir ki, borudan çıxan "yeni” şüalar kitabdan asanlıqla keçir və zəifləmir. Rentgen növbəti təcrübələrin birində boşalma borusunu çexolladıqda platin-gümüş sianid ekranının işıqlandığını müşahidə edir.

Yeniliyi görən Rentgen başa düşür ki, boşalma borusu işlədikdə güclü keçmə qabiliyyətinə malik olan şüalanma yaranır. O öz kəşfini Vürtsburq Təbiəti Öyrənənlər Cəmiyyətinin iclasında nümayiş etdirir. Alim yeni şüaların xassələrini ətraflı öyrəndiyinə görə yığıncaq həmin şüalara Rentgen adı verir.

Rentgen şüaların sirrini öyrənərkən qəribə fotoşəkillər çəkir və yeddi həftə laboratoriyanı tərk etmir.

Bu şüaların xassələrinə görə müxtəlif tətbiq sahələri barədə camaat arasında çoxlu şayiə yayılır. Onlar qorxurdular ki, Rentgen şüalarının köməyi ilə onların fikirlərini oxumaq, divar arxasından mənzillərinə baxmaq mümkün olacaqdır. Bəzi qəzetlər isə hətta Rentgen şüaları ilə işıq salınmasını əxlaqsızlıq, ədəbsizlik olduğunu elan etdilər. Lakin onlar bilmirdilər ki, bu şüalar gələcəkdə milyonlarla insana şəfa verəcəkdir.

Günəş və digər kosmik obyektlər Rentgen şüalarının təbii mənbələridir. Rentgen şüaları gözlə görünmür. Onları yalnız göstərdikləri təsirə görə müəyyən etmək olar. Rentgen şüaları metallardan, qeyri-metaldan, üzvi maddələrdən keçə bilir. Bu səbəbdən rentgen şüaları tibdə, texnikada istifadə olunur. Rentgen şüaları atomun, molekulun, kristalların quruluşunu öyrənməyə imkan verir.

Beləliklə, rentgen şüaları xəstələrin müayinə və müalicəsinin əvəzsiz vasitəsinə çevrildi, bunları texnikada tətbiq etdilər, elmdə yeni dövr açıldı, atomun quruluşunun tədqiqinə başlandı. Atomun kristal daxilində düzülmə qaydasını rentgen şüalarının köməyi ilə öyrəndilər.