Şirvan şəhərində məcburi köçkünlər üçün 685 ailəlik yaşayış massivi salınır

Dövlət Qaçqınkomunun Şirvan üzrə məsləhətçisi Fəxrəddin Niftəliyev və Zəngilan Rayon İcra Hakimiyyətinin səlahiyyətli nümayəndəsi Həsən Hüseynovla məcburi köçkünlər üçün salınan şəhərciyə çatanda gördük ki, böyük bir ərazinin hər tərəfində qızğın iş gedir.

Qaldırıcı kranlar, ekskavatorlar, ağırtonlu yük maşınları, digər texnikalar hamısı hərəkətdə idi. Ustalar divar hörür, beton tökür, suvaq vurur, digər işləri görürdülər. Belə bir mənzərəni seyr etdikcə bəzi ağzıgöyçəklərin mitinqlərdə, orada-burada neftdən gələn gəlirlərin heç nəyə xərclənmədiyindən danışanlar yada düşdü. Onlar ölkədə gedən quruculuq işlərini - tikilən məktəbləri, xəstəxanaları, müalicə-diaqnostika mərkəzlərini, elektrik stansiyalarını, idman komplekslərini, sənaye müəssisələrini, çəkilən yolları, qaçqın və köçkünlər üçün salınan yaşayış evlərini və onlarca, yüzlərlə belə layihələrin icrasını görmürlər? Əgər görmürlərsə, buyursunlar Şirvan şəhərinə, görsünlər burada yaşayan qaçqın və köçkünlər üçün salınan 685 ailəlik şəhərciyi, tikintinin sürətini, vüsətini...

Tikintinin baş texniki nəzarətçisi İldırım Babayev dedi ki, salınan şəhərcikdə doqquzmərtəbəli 13 yaşayış, 540 şagirdlik üçmərtəbəli məktəb, 140 yerlik uşaq bağçası, EATS binaları, klub, icma mərkəzi, inzibati bina, tibb məntəqəsi, hər biri 500 kubmetrlik 4 su anbarı, istilik sistemi üçün qazanxana, müxtəlif güclü 3 elektrik yarımstansiyası, idman meydançaları, park olacaq: "Bundan əlavə, salınacaq küçələrə asfalt döşənəcək, işıqlandırma sistemi quraşdırılacaq. 3 kilometr məsafədən buraya təbii qaz, içməli su xətləri gətiriləcək, kanalizasiya sistemi yaradılacaq, uzunluğu 3,7 kilometr olan şose yolu çəkiləcək”.

Obyektin inşasında tender müsabiqəsində qalib çıxmış 17 tikinti təşkilatı iştirak edir. Onların hər biri ayrı-ayrılıqda fəaliyyət göstərir. Tikintinin rəhbər və mütəxəssisləri də hər gün buradadırlar. Ayrı-ayrılıqda hər birinin səyyar ofisi var. "Rabitə-İnşaat” ASC, "Minera” MMC, "Tunel-Metro-İnşaat” MMC və başqaları işin sürəti ilə yanaşı, keyfiyyətinə də xüsusi diqqət yetirirlər.

Qeyd edək ki, obyektdə işə cari ilin yanvar ayında başlanılıb. Bu müddət ərzində bir neçə doqquzmərtəbəli binanın 3-cü, 540 yerlik məktəbin 2-ci mərtəbəsində, qazanxanada bütün işlər başa çatdırılıb. Öyrəndik ki, mal-material sarıdan heç bir çatışmazlıq yoxdur. Tikintiyə 60-dan çox müxtəlif markalı texnika cəlb olunmuşdur. Usta və fəhlələrin sayı 800 nəfərdir. Onların çoxu Şirvan şəhərinin sakinləridir. Hər bir tikinti təşkilatı öz fəhlə və mütəxəssislərini xüsusi geyimlə təmin etmişdir. Ərazidə onlara xidmət göstərmək üçün yeməkxana yaradılmışdır. Aylıq əməkhaqqı orta hesabla 500 - 1000 manat arasındadır.

Məlumat üçün bildirək ki, doqquzmərtəbəli yaşayış binalarında mənzillərin ümumi sahəsi 74 min 208 kvadratmetrdir. Mənzillərdəki otaqların sayına gəldikdə isə onlardan 64-ü bir, 298-i iki, 270-i üç, 53-ü dördotaqlı olacaq.

Baş texniki nəzarətçi İ.Babayev sifarişçisi Məcburi Köçkünlərin Sosial İnkişaf Fondunun olduğu şəhərciyin iyul ayında istifadəyə veriləcəyini bildirdilər. Beynimizdə belə bir sual yarandı: yarım ildə bu böyüklükdə obyektdə işləri tamamlamaq olarmı? Sualımıza özümüz də cavab tapdıq - əgər qısa müddətdə bu qədər işlər görülübsə, qalan vaxt ərzində şəhərciyi də təhvil vermək mümkündür.

Seyran CAVADOV,

"Azərbaycan”