Hörmətli cənab Prezident!

Azərbaycan gəncliyinin ən böyük hamisi kimi hər zaman bizlərə göstərdiyiniz diqqət və qayğıdan qürur duymuşuq. Təhsil sahəsində apardığınız islahatlar ölkədə gənclərin daha mükəmməl təhsil almaları üçün real imkanlar yaradıb.

Bütün bu uğurları görən bir Azərbaycan gənci kimi mən də yaxşı təhsil alıb gələcəkdə dövlətimə, xalqıma layiqli xidmət etmək üçün bir yol seçdim. Orta məktəbi qızıl medalla başa vurub test imtahanlarında yüksək bal toplayaraq Prezident təqaüdçüsü kimi ADA Universitetində təhsil almağa başladım.

Cənab Prezident, 2019-cu il başlayandan həm ölkə əhalisinin sosial rifahının, həm də bütün tələbələrin maddi vəziyyətinin yaxşılaşdırılması, Prezident təqaüdünün artırılması istiqamətində imzaladığınız sərəncam və fərmanlar hər kəsdə fəxarət hissi yaradıb. Bu həm də bizim - Prezident təqaüdçülərinin məsuliyyətini bir qədər də artırıb. Digər tərəfdən tələbələrin təqaüdlərinə 30 faiz əlavənin edilməsi gənclərin fəallığına stimul yaradıb.

Cənab Prezident, bizə göstərdiyiniz bu diqqət və qayğıya görə həm öz adımdan, həm də universitetimizdə təhsil alan bütün Prezident təqaüdçüləri adından Sizə dərin təşəkkürümü bildirirəm. Söz veririk ki, göstərdiyiniz etimadınıza adekvat olaraq üzərimizə düşən məsuliyyətli işi layiqincə doğrultmaq üçün əlimizdən gələni əsirgəməyəcək və hər zaman yürütdüyünüz uğurlu siyasətin müdafiəçisi olacağıq. İnanırıq ki, hərtərəfli dəstək göstərdiyiniz gənclər yüksək səviyyədə təhsil alıb bu gün qurduğunuz qüdrətli Azərbaycan dövlətinin gələcəkdə daha da güclənməsi, çiçəklənməsi yolunda layiqli xidmət missiyalarını uğurla yerinə yetirəcəklər.

Ayxan DADAŞOV,

ADA Universitetinin Hüquq fakültəsinin I kurs tələbəsi, 695 bal toplamış Prezident təqaüdçüsü