İqbal MƏMMƏDOV, Milli Məclisin deputatı:

- Siyasi, iqtisadi və hərbi böhranların səngimədiyi çağdaş dövrümüzdə ili yüksək ovqatda və inkişaf göstəriciləri ilə başa vurmaq hər bir dövlətə müyəssər olmur. Tənəzzül, geriləmə və sosial rifahın daha da pisləşməsi dünyanın bir çox ölkələrinin üzləşdiyi reallıqlardır. Bu gerçəkliyi çox uzaqlarda yox, elə Azərbaycana yaxın coğrafiyada yerləşən ölkələrdə də görmək mümkündür.

Azərbaycan dünya birliyinin üzvüdür, iqtisadiyyatımız dünya iqtisadiyyatına inteqrasiya edib. Və fəxarət hissi ilə deməliyik ki, respublikamız geridə qoyduğumuz 2018-ci ili də inkişaf göstəriciləri ilə başa vurdu. Prezident İlham Əliyevin uzaqgörən siyasi və iqtisadi kursu ötən ildə də olduqca böyük və möhtəşəm uğurların əldə edilməsini şərtləndirdi. Bəzi faktlara nəzər yetirməklə Azərbaycanın ötənilki siyasi və iqtisadi nailiyyətlərinin miqyasını və sanbalını görə bilərik.

2018-ci il ölkəmizin ictimai-siyasi həyatında yubileylər və seçki ili kimi də qaldı. Belə ki, xalqımız mühüm əlamətdar tarixlərin və hadisələrin - ulu öndər Heydər Əliyevin anadan olmasının 95-ci ildönümünü, Azərbaycan Xalq Cümhuriyyətinin yaradılmasının 100 illiyini, Milli Qurtuluş Gününün 25-ci ildönümünü qeyd etdi. Silahlı Qüvvələrimizin yaranmasının və Bakının işğaldan azad edilməsinin 100-cü ildönümü münasibətilə keçirilən hərbi paradlar ordumuzun və bütövlükdə dövlətimizin qüdrətinin nümayişi oldu. Ötən il Naxçıvandakı Günnüt qələbəsi isə bir daha göstərdi ki, Ali Baş Komandanı İlham Əliyev olan Azərbaycan Ordusu qarşısında dayanan bütün vəzifələri layiqincə yerinə yetirməyə qadirdir.

Təbii ki, ötən ilin ən mühüm siyasi hadisəsi aprelin 11-də keçirilən prezident seçkiləri oldu. Xalqımız, seçicilərimiz bu seçkidə də ən layiqli namizədi dəstəklədilər, cənab İlham Əliyevin ətrafında birləşməklə inkişafın davamlı olmasına, daha qüdrətli Azərbaycana səs verdilər. Xalqımız daxili inamına söykənərək ölkəni əlahiddə inkişaf yoluna çıxarmış siyasətin müəllifinə - cənab İlham Əliyevə səs verməklə ağı qaradan seçməyi bacardığını, ölkənin taleyinə biganə olmadığını göstərdi. Prezident seçkilərinin nəticəsi həm də bir daha təsdiq etdi ki, xalqımız Heydər Əliyev yolunun davamına alternativ görmür.

2018-ci il həm də Prezident İlham Əliyevin müəllifi olduğu möhtəşəm infrastruktur layihələrin icrasının başa çatması ilə əlamətdar oldu. Ötən ilin may ayının sonlarında "Cənub qaz dəhlizi”nin istifadəyə verilməsi göstərdi ki, ulu öndərin əsasını qoyduğu enerji siyasəti Prezident İlham Əliyev tərəfindən uğurla davam etdirilir və Azərbaycan dövləti istənilən qlobal layihəni həyata keçirməyə qadirdir. Həm də bütün dünya gördü ki, Prezident İlham Əliyevin rəhbərliyi ilə Azərbaycan müəyyən etdiyi vəzifələri vaxtında yerinə yetirən, aydın və düşünülmüş strategiyası, dəqiq siyasəti olan dövlətdir.

Bundan bir neçə gün sonra isə "Cənub qaz dəhlizi”nin əsas seqmentlərindən olan TANAP kəmərinin açılışı oldu. Təməli 2015-ci il martın 17-də qoyulan layihə üzrə bütün işlər vaxtında yerinə yetirildi. Eyni zamanda ötən il Türkiyənin İzmir şəhərində "Star” neft emalı zavodunun istifadəyə verilməsi də Azərbaycanın böyük uğurudur. Çünki bu zavod Azərbaycanın, SOCAR-ın sərmayəsi ilə tikilib, ərsəyə gətirildi və buradan əldə olunan gəlirdən həm Azərbaycan, həm də Türkiyə qazanacaq. Ötən il istifadəyə verilən başqa bir möhtəşəm ünvan isə Bakı Beynəlxalq Dəniz Ticarət Limanı Kompleksi oldu. Bir daha təsdiq olundu ki, Azərbaycan ən mürəkkəb infrastruktur layihələrini həyata keçirmək imkanlarına malikdir.

Bu cür infrastruktur layihələrini həyata keçirən Azərbaycanın 2018-ci ildəki iqtisadi nailiyyətləri də təqdirəlayiqdir. Görünən odur ki, bir neçə il öncə Prezident İlham Əliyevin başlatdığı yeni iqtisadi islahatlar öz bəhrəsini verir və ölkəmizdə xüsusən qeyri-neft sektorunda ciddi artım var. Bu islahatlar çərçivəsində həyata keçirilən yeni sosial-iqtisadi inkişaf strategiyası 2018-ci ildə milli iqtisadiyyatımızın bütün sahələrinin davamlı inkişafını təmin edərək müsbət nəticələrin əldə edilməsi ilə müşayiət olunub, makroiqtisadi göstəricilər nəzərəçarpacaq dərəcədə artıb.

Yanvarın 11-də Prezident İlham Əliyevin sədrliyi ilə Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında ötən ilin iqtisadi nailiyyətləri ətraflı müzakirə edilib. Dövlət başçısının qeyd etdiyi kimi, 2018-ci il ölkəmiz üçün uğurlu olub, Azərbaycan hərtərəfli və dinamik inkişaf edib. Prezident İlham Əliyevin diqqətə çatdırdığı əsas iqtisadi göstəricilər də ötən ilin inkişaf dövrü olduğunu göstərir. Belə ki, ötən il ümumi daxili məhsul 1,4 faiz, qeyri-neft sektoru 1,8, sənaye istehsalı 1,5, kənd təsərrüfatı isə 4,6 faiz artıb. Valyuta ehtiyatları 45 milyard dollara çatıb, ölkədə 118 min daimi iş yeri açılıb.

Yanvarın 29-da keçirilən "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfrans isə ölkəmizin daha möhtəşəm inkişaf mənzərəsini ortaya qoydu. Belə ki, müşavirə regionların inkişafına dair üçüncü proqramın icrasının başa çatmasına həsr olunsa da, orada səslənən rəqəmlər son 15 ildə ölkəmizin hansı inkişaf yollarından keçdiyini göstərdi. Bu dövrdə ümumi daxili məhsul 3,3 dəfə, sənaye potensialı 2,6 dəfə artıb. Valyuta ehtiyatları 24 dəfə artaraq hazırda 45 milyard dollar təşkil edir. Bu illərdə ölkəyə ümumilikdə 250 milyard dollar sərmayə qoyulub, 100 mindən çox müəssisə yaradılıb, 15 min kilometr avtomobil yolu çəkilib. Əlbəttə, əldə olunan uğurlar sosial sahəyə də mühüm təsir edib. Belə ki, ötən 15 ildə - maaşlar 7, pensiyalar 9 dəfə artıb. Həyata keçirilmiş məqsədyönlü tədbirlər nəticəsində ölkədə 1,5 milyonu daimi olmaqla 2 milyondan çox yeni iş yeri yaradılıb, işsizlik 5 faizə, yoxsulluq səviyyəsi isə 5,1 faizə enib. 3 mindən çox məktəb əsaslı təmir edilib və ya yenidən tikilib. 650-yə yaxın tibb müəssisəsi tikilib və yenidən qurulub, 44 olimpiya mərkəzi yaradılıb.

Bütün bu rəqəmlər kifayət qədər sanballıdır və Azərbaycanın ötən 15 illik inkişaf salnaməsinin göstəriciləridir. Lakin cənab Prezidentin dəfələrlə qeyd etdiyi kimi, əldə edilmiş uğurlar bizi arxayınlaşdırmamalıdır. Artıq Prezident İlham Əliyev "Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nı təsdiq edib. Bununla bağlı imzalanan fərmandan göründüyü kimi, regionların, o cümlədən kənd yerlərinin sosial-iqtisadi inkişafı sahəsində görülmüş işləri növbəti illərdə də davam etdirmək, infrastrukturun və sosial xidmətlərin daha da yaxşılaşdırılması, bölgələrdə yaşayan əhalinin məşğulluğunun və maddi rifahının yüksəldilməsi qarşıdakı illərdə də prioritet olacaq.

Sözsüz ki, yeni dövlət proqramının hədəfləri də yenidir. Bu isə o deməkdir ki, qarşıda Azərbaycanda keyfiyyətcə yeni, indikindən də fərqli inkişaf tendensiyaları müşahidə olunacaq. Başqa cür də o bilməz. Çünki müəllifi İlham Əliyev olan inkişaf kursu Azərbaycana yalnız və yalnız yüksəliş, dinamik iqtisadi nailiyyətlər və yüksək sosial rifah bəxş edir.

Bir məsələni də qeyd edim ki, Prezident İlham Əliyevin sərəncamı ilə minimum aylıq əməkhaqqının məbləği artırılaraq martın 1-dən 180 manat müəyyən edildi. Bu ölkədə həyata keçirilən uğurlu sosial siyasətin təsdiqi olmaqla yanaşı, həm də iqtisadi inkişafın göstəricisidir. Ölkənin artan iqtisadi gücü ilk növbədə vətəndaşların sosial rifahının gücləndirilməsinə xidmət edir.