Əgər Azərbaycan iqtisadiyyatının gələcəkdə dayanıqlığı qeyri-neft sektorunun inkişafı ilə bağlıdırsa, qeyri-neft sektorunun bugünkü inkişafı sözügedən sahəyə kapital qoyuluşundan asılıdır. Məhz bu nəzərə alınaraq ölkəmizdə sözügedən sektora kapital qoyuluşu ilbəil artırılır.

Təkcə ötən ilin 11 ayı ərzində əsas kapitala yönəldilmiş 12,8 milyard manatlıqdan çox vəsaitin əksər hissəsi qeyri-neft sektorunun inkişafına yönəldilmişdir. Dövlət Statistika Komitəsinin məlumatına istinadən daha dəqiq desək, bu dövrdə qeyri-neft sektoruna yönəldilən vəsaitin həcmi 21,2, o cümlədən qeyri-neft sənayesinə qoyulan investisiyalar 22,6 faiz artmışdır. İstifadə olunan vəsaitin 68,4 faizi məhsul istehsalı, 23,5 faizi xidmət obyektlərinin, 8,1 faizi isə ümumi sahəsi 1,8 milyon kvadratmetrdən çox olan yaşayış evlərinin tikintisinə sərf edilmişdir. O da maraqlı faktdır ki, əsas kapitala, o cümlədən qeyri-neft sektoruna yönəldilən vəsaitlərin 63,1 faizini daxili vəsaitlər təşkil etmişdir. Daxili vəsaitlərin tərkibində isə qeyri-dövlət sektoru sərmayədarlarının xüsusi çəkisi də az olmamışdır - 48,2 faiz.

Maraqlı fakt həm də odur ki, bu vəsaitlər hesabına tikilib istifadəyə verilən qeyri-neft müəssisələrinin əksəriyyətinin ünvanı regionlardır. Sumqayıt Kimya Sənaye Parkındakı Tütün məmulatları istehsalı fabriki, Polipropilen, Əlvan metallar və ferroərintilər, İnşaat kimyəviləri zavodları, Mingəçevir Sənaye Parkında iplik istehsalı üzrə 2 müəssisə, Goranboyda "Region aqropark”, "Azərxalça”nın Ağdam, İsmayıllı və Xaçmaz filialları, İsmayıllıda heyvandarlıq kompleksi, Neftçala Sənaye Məhəlləsində "Xəzər” avtomobil zavodu, Şamaxıda üzümçülük və şərabçılıq kompleksi, eləcə də əksər regionları əhatə edən çoxsaylı avtomobil yolları, elektrik yarımstansiyaları, təhsil, səhiyyə və idman müəssisələri yalnız keçən il bölgələrdə istifadəyə verilən obyektlərin bir hissəsidir.