Azərbaycanda qeyri-neft sektorunun inkişafı istiqamətində görülən tədbirlər məşğulluq sahəsində də müsbət nəticələr verir. Belə nəticələrdən biri bu gün işləyən ölkə əhalisinin əksər hissəsinin qeyri-neft sektorunda cəmləşməsidir.

Dövlət Statistika Komitəsinin son məlumatına görə, 2018-ci il dekabrın 1-i vəziyyətinə Azərbaycanda iqtisadi fəal əhalinin sayı 5,1 milyon nəfərdən çox olmuşdur ki, onlardan da 4,8 milyon nəfəri işlə təmin edilmişdir. Ötən il noyabrın 1-i vəziyyətinə muzdla işləyənlərin sayı 1,5 milyon, o cümlədən iqtisadiyyatın dövlət sektorunda 884,7 min, qeyri-dövlət sektorunda 668,1 min nəfər olmuşdur. Sözügedən dövrə olan məlumata görə, neft sektorunda 33,9 min, qeyri-neft sektorunda 1,5 milyon nəfər çalışmışdır.

Müəssisə və təşkilatlarda çalışan işçilərin 23,9 faizi məhsul istehsalı sahələrində, o cümlədən 7,2 faizi tikintidə, 7 faizi emal sənayesində, 3,3 faizi aqrar sektorda, eləcə də meşə təsərrüfatı və balıqçılıqda, 2,5 faizi su təchizatı, tullantıların təmizlənməsi və emalında, 2,2 faizi mədənçıxarmada, 1,7 faizi elektrik enerjisi, qaz və buxar istehsalı, bölüşdürülməsi və təchizatı sahələrində məşğul olmuşdur.

Xidmət sahələrinə gəldikdə, bu sektorda işləyənlərin 21,4 faizi təhsil, 18,6 faizi ticarət və nəqliyyat vasitələrinin təmiri, 8,5 faizi əhaliyə səhiyyə və sosial xidmətlərin göstərilməsi, 7 faizi dövlət idarəetməsi və müdafiə; sosial təminat, 4,6 faizi nəqliyyat və anbar təsərrüfatı, 3,5 faizi istirahət, əyləncə və incəsənət, 3,4 faizi peşə, elmi və texniki fəaliyyət, 1,9 faizi inzibati və yardımçı xidmətlərin göstərilməsi, 1,6 faizi informasiya və rabitə, bir o qədər maliyyə və sığorta fəaliyyəti, 1,5 faizi turistlərin yerləşdirilməsi və ictimai iaşə və bir o qədər daşınmaz əmlakla əlaqədar əməliyyatlar, 1 faizi isə digər sahələrdə cəmləşmişlər.

Onu da qeyd edək ki, ötən il dekabr ayının 1-i vəziyyətinə məşğulluq xidmət orqanları tərəfindən ölkə üzrə rəsmi işsiz statusu verilmiş şəxslərin sayı 30,4 min nəfər olmuşdur. İşsizlikdən sığorta ödənişinin orta məbləği isə 213 manata çatmışdır.