Aqrar sektora dövlət tərəfindən qoyulan investisiyalar ilbəil artır, yeni fermer təsərrüfatları yaranır. Bunun da nəticəsində həm daxili bazarda bolluq yaranır, həm də ölkənin ixrac potensialı çoxalır.

İxtisasca bioloq olan Arif Qazıyev də dövlətin iş adamlarına göstərdiyi qayğıdan ruhlanaraq Samux rayonunun Ağasıbəyli kəndində fermer təsərrüfatı yaradıb. Özünə məxsus torpaq sahəsində bostan bitkiləri yetişdirməklə yanaşı, heyvandarlıq, quşçuluq və arıçılıqla da məşğul olur, hər il uğurlu göstəricilər qazanır. Hazırda təsərrüfatda xeyli iribuynuzlu və xırdabuynuzlu mal-qara var. Onların qış mövsümündə yemlə təminatında da problem yoxdur. Bunun üçün 0,5 hektarda yonca əkən fermer toplanan yemin mal-qaraya bəs etdiyini söyləyir. Təsərrüfatda 50 təknə arı ailəsi də saxlayır, hər il bal satmaqla da xeyli gəlir götürür.

Arif Qazıyev Azərbaycan Dövlət Aqrar Universitetinin dosentidir. Rusiya Təbiətşünaslıq Akademiyasının fəxri professorudur. Mətbuatda kənd təsərrüfatına aid məqalələrlə çıxış edir. Onunla təsərrüfatda görüşdük. Dedi ki, boş vaxtlarımda təsərrüfatla məşğul oluram. Hərdən tələbələrimi də bura gətirib təcrübə keçirəm.

Ölkə rəhbərinin iş adamlarına yaratdığı şəraiti yüksək qiymətləndirən və buna görə minnətdarlıq edən Arif Qazıyev söhbət əsnasında qeyd etdi ki, yaradılan şəraitdən bəhrələnərək, təsərrüfatı genişləndirmək fikrindədir. Bunun üçün kənddə pay torpaqları olan bir neçə nəfərlə danışıqlar aparır. Razılıq olsa, əkin sahələrini genişləndirərək taxıl əkmək arzusundadır. Hazırda gələn ilin bol məhsulu üçün hazırlıq işlərinə başlanılıb. Əkin sahələri təmizlənir, bostan bitkilərinin əkini üçün yer hazırlanır.

Təsərrüfatda 6 nəfər daimi işlə təmin edilmişdir. Məhsul satışından əldə olunan gəlir işçilər arasında münasib bölünür.

S.ƏLİYEV,

"Azərbaycan”