14 Noyabr 2018 17:40
787
Elm və texnika
A- A+

Milli Elmlər Akademiyası BMT ilə əlaqələri gücləndirir


Noyabrın 14-də Azərbaycan Milli Elmlər Akademiyasının (AMEA) Rəyasət Heyətində BMT-nin ölkəmizdəki rezident əlaqələndiricisi Qulam İshaqzainin rəhbərlik etdiyi nümayəndə heyəti ilə görüş keçirilib.

AMEA-dan AZƏRTAC-a bildirilib ki, görüşdə iki qurum arasında yeni əməkdaşlıq imkanları, o cümlədən BMT-nin Davamlı İnkişaf Məqsədlərinin həyata keçirilməsi və ətraf mühit problemlərinin həllində birgə fəaliyyət perspektivlərinə dair müzakirələr aparılıb.

AMEA-nın prezidenti, akademik Akif Əlizadə Göyçayda keçirilən XIII Nar festivalı, eləcə də akademiyada nar bitkisinin öyrənilməsi istiqamətində aparılan tədqiqatlar haqqında məlumat verib. AMEA rəhbəri Prezident İlham Əliyevin müvafiq fərmanlarına və sərəncamlarına əsasən Azərbaycanda aqrar sahənin inkişafı istiqamətində kompleks tədbirlər həyata keçirildiyini diqqətə çatdırıb. Bildirib ki, akademiya ölkə rəhbərinin aqrar sahədə qarşıya qoyduğu vəzifələrin yerinə yetirilməsində fəal iştirak edir, müxtəlif layihələri uğurla reallaşdırır.

BMT-nin yaratdığı imkanlardan səmərəli istifadə edərək Azərbaycanda da müvafiq elm sahələrinin inkişafına nail olmağın vacibliyini qeyd edən akademik A.Əlizadə bu yöndə birgə əməkdaşlığın mühüm rolu olduğunu vurğulayıb. Bildirib ki, AMEA-da fəaliyyət göstərən alim və mütəxəssislərin BMT-nin təşkil etdiyi qrant layihələrdə fəal iştirakı, həmçinin ölkəmizin beynəlxalq aləmə inteqrasiyasına təkan verəcək.

A.Əlizadə MDB ölkələrinin elmlər akademiyaları arasında ilk dəfə olaraq AMEA-da Yüksək Texnologiyalar Parkının (YTP) yaradıldığını diqqətə çatdıraraq, onun fəaliyyət istiqamətləri barədə danışıb. Qeyd edib ki, YTP müasir elmi və texnoloji nailiyyətlərə əsaslanan innovasiya və yüksək texnologiya sahələrinin genişləndirilməsi istiqamətində uğurla fəaliyyət göstərir. Alim nümayəndə heyətini YTP-də həyata keçirilən layihələr və onun infrastrukturu ilə yaxından tanış olmağa dəvət edib.

Akademik A.Əlizadə AMEA-da yaradılması nəzərdə tutulan, respublika miqyaslı Analitik Mərkəz haqqında da məlumat verib. Alimin sözlərinə görə, bu birləşmiş mərkəz bir çox elm sahələri, eləcə də dövlət qurumlarını əhatə edəcək. Hazırda Azərbaycan-BMT münasibətlərinin yeni mərhələdə olduğunu deyən AMEA rəhbəri bu nüfuzlu qurumun köməyilə Analitik Mərkəzin sürətli inkişafına nail olmağın mümkünlüyünü ifadə edib.

Sonra AMEA prezidenti Xəzəryanı dövlətlərin başçılarının Xəzər dənizinin hüquqi statusu haqqında imzaladığı Konvensiyadan danışıb. Bildirib ki, əsas məqsəd bu dənizin imkanlarını, orada baş verən ekoloji dəyişiklikləri, antropogen təsirləri və s. öyrənmək, zəruri tədbirləri birgə həyata keçirməkdir.

Akademik A.Əlizadə ətraf mühit və biomüxtəlifliyin qorunmasının, yüksək texnologiyaların inkişafının AMEA-da prioritet istiqamətləri təşkil etdiyini nəzərə çatdırıb. O, BMT-dən olan nümayəndələrə rəhbərlik etdiyi qurumun ayrı-ayrı institut və təşkilatları ilə yaxından tanış olmağı, bundan sonra isə konkret əməkdaşlıq imkanlarının müəyyənləşdirilməsi və anlaşma memorandumunun imzalanmasını təklif edib.

BMT-nin Azərbaycandakı rezident əlaqələndiricisi Qulam İshaqzai təmsil etdiyi qurum ilə ölkəmiz arasında bir sıra layihələrin uğurla icra olunduğunu bildirib. Bu kimi innovativ layihələrin reallaşdırılmasında BMT-nin hərtərəfli dəstəyini xüsusi qeyd edib. Q.İshaqzai Prezident İlham Əliyevin 2016-cı il 6 oktyabr tarixli Fərmanı ilə Azərbaycan Respublikasının Dayanıqlı İnkişaf üzrə Milli Əlaqələndirmə Şurasının yaradıldığını deyib. O, Milli Əlaqələndirmə Şurasının qısa vaxt ərzində bir çox mühüm tədbirləri həyata keçirdiyini diqqətə çatdırıb. BMT-nin nümayəndəsi AMEA-da dünya elminin çağırışlarına cavab verən pilot layihələrin həyata keçirilməsinin, birgə əməkdaşlıq çərçivəsində kadr və təcrübə mübadiləsinin aparılmasının, ölkə elminin təbliğinin məqsədəuyğun olduğunu vurğulayıb.

AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev rəhbərlik etdiyi qurumda informasiya texnologiyaları və informasiya cəmiyyəti problemlərinin müxtəlif istiqamətləri üzrə aparılan elmi tədqiqatlardan danışıb. Qeyd edib ki, institutda informasiya təhlükəsizliyi, biometrik texnologiyalar, informasiya və biliklər iqtisadiyyatı, proqram mühəndisliyi, e-dövlətin formalaşması, e-təhsil və s. istiqamətlərdə araşdırmalar aparılır.

Biologiya və Tibb Elmləri Bölməsinin akademik-katibi, akademik Əhliman Əmiraslanov BMT ilə elmi əlaqələrin inkişafını yüksək qiymətləndirib, bu əməkdaşlığın Genetik Ehtiyatlar, Botanika, Molekulyar Biologiya və Biotexnologiyalar institutlarının və bütövlükdə AMEA-nın gələcək fəaliyyətinə mühüm töhfələr verəcəyinə əminliyini ifadə edib.
Genetik Ehtiyatlar İnstitutunun direktoru, AMEA-nın müxbir üzvü Zeynal Əkpərov BMT ilə qlobal elmi layihələrin icrasının əhəmiyyətini önə çəkib. Fizioloji, kimyəvi, biomüxtəlifliyin qorunması, aqrar, qida təhlükəsizliyi və digər istiqamətlərdə əməkdaşlığın vacibliyindən danışıb.
Görüşdə, həmçinin ətraf mühit, davamlı inkişaf və digər məsələlərə dair müzakirələr aparılıb, elmi əlaqələrin gücləndirilməsinə dair bir sıra təkliflər irəli sürülüb.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video