07 Noyabr 2018 22:22
414
CƏMİYYƏT
A- A+

Biləsuvarda Milli Qəhrəman Mübariz İbrahimovun xatirəsi anılıb


Noyabrın 7-də Biləsuvar rayonunda Azərbaycanın Milli Qəhrəmanı Mübariz İbrahimovun xatirəsi anılıb.
AZƏRTAC-ın bölgə müxbiri xəbər verir ki, Biləsuvar Rayon İcra Hakimiyyətinin başçısı Mahir Quliyev, hüquq-mühafizə orqanlarının rəhbərləri və ictimaiyyət nümayəndələri rayonun Əliabad kəndində Milli Qəhrəmanın evini ziyarət edərək, ailəsi ilə görüşüblər.

Rayon icra hakimiyyətinin başçısı Mahir Quliyev Milli Qəhrəman Mübariz İbrahimovun həyatından və torpaqlarımızın müdafiəsi zamanı göstərdiyi şücaətdən danışaraq deyib: "Mübariz qısa ömür yaşasa da, canını Vətən uğrunda fəda etməsi ilə özündən sonra böyük qəhrəmanlıq məktəbi qoydu. İndi hər bir azərbaycanlı onunla fəxr edir”.

Qeyd olunub ki, Mübariz 2010-cu il iyunun 18-də xidmət etdiyi cəbhənin Talış-Borsunlu istiqamətində düşmənin qərargahına girərək, əsl cəngavər kimi beş saat təkbaşına döyüşüb. Ermənilər əvvəlcə elə zənn ediblər ki, onlara qarşı Azərbaycan Ordusu hücuma keçib. Gecənin qaranlığında çaşbaş qalan düşmən Azərbaycan əsgərinin qəhrəmanlığı nəticəsində ağır itkilər verir. Düşmən bir neçə saat davam edən döyüşə əlavə qüvvə cəlb edib. Amansız döyüşdə Mübariz İbrahimov qəhrəmancasına həlak olub. Nəşi düşməndən alınaraq, 2010-cu il noyabrın 7-də onunla vida mərasimi keçirilib.

Diqqətə çatdırılıb ki, Mübariz İbrahimovda olan Vətən, torpaq sevgisi, vətənpərvərlik ruhu onu şəhidlik zirvəsinə ucaldıb. O, öz şərəfli ölümü, qəhrəmanlığı ilə Azərbaycan əsgərinin nəyə qadir olduğunu bütün dünyaya sübut etdi.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin müvafiq Sərəncamına əsasən, torpaqlarımızın azadlığı uğrunda rəşadətli və müstəsna xidmətlərinə görə Mübariz İbrahimov "Azərbaycanın Milli Qəhrəmanı" adına layiq görülüb.

Mübariz İbrahimov ölümün gözünə dik baxaraq, Vətən sevgisinin heç nə ilə əvəz olunmadığını bir daha sübut etdi. O, bu şücaəti ilə Azərbaycan gəncliyinə başucalığı gətirdi. Bu gün hər bir gənc Mübarizin qəhrəmanlığından örnək alır, nümunə götürür. Təhsil müəssisələrimizdə şagirdlərimizə Mübariz vətənpərvərliyi aşılanır, hərbi xidmətə yola salınan gənclərimizə Vətəni necə qorumağı Mübarizdən öyrənmələri təbliğ olunur.

Milli Qəhrəmanın atası Ağakərim İbrahimov ailəsinə göstərilən yüksək diqqət və qayğıya görə Azərbaycan Respublikasının Prezidenti İlham Əliyevə minnətdarlığını bildirib.

Anım gününün iştirakçıları Azərbaycanın Milli Qəhrəmanı Mübariz İbrahimova məxsus müxtəlif şəkillər, haqqında yazılmış kitablar, jurnallar və qəzetlərdən ibarət guşəyə baxıblar.

Sonda Azərbaycan Respublikasının Prezidenti İlham Əliyevin tapşırığına əsasən inşa olunacaq Mübariz İbrahimovun xatirə muzeyinin tikiləcəyi əraziyə baxış keçirilib.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video