Dünən İsmayıllı rayonunda Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Təbii Sərvətlər və Həyat Elmləri Universitetinin texniki və elmi dəstəyi ilə "Azərbaycanda Dayanıqlı İnkişaf Məqsədlərinin (DİM) həyata keçirilməsində potensialların artırılmasına dəstək” layihəsi çərçivəsində regional seminar keçirilib. "Azərbaycanda DİM-lərin icrası üçün yerli dövlət özəl fərdi şəxslər arasında əməkdaşlıq” mövzusu seminarın gündəliyində olub.

İsmayıllı Rayon İcra Hakimiyyətinin başçısı Mirdaməd Sadıqov regional seminarı açaraq qeyd edib ki, seminarın təşkilatçıları, xüsusilə FAO-nun Tərəfdaşlıq və Əlaqələndirmə Ofisi, onun rəhbəri xanım Mələk Çakmak çox xeyirxah bir məqsədlə bu rayona gəlib. Burada iştirak edən fermerlər, kənd təsərrüfatı işçiləri, özəl iş sahibləri, mütəxəssislər diqqətlə öyrəndiklərini öz fəaliyyət sahələrində tətbiq etməklə uğurları artıra bilərlər. O deyib ki, kənd təsərrüfatı istehsalını artırmaq üçün zamana uyğun aqrar idarəetmə metodlarına diqqət yetirilməlidir. Kiçik torpaq sahibkarlığına son qoyub, kooperativlər, aqrokomplekslər, aqrokombinatlar yaratmaqla yeni təsərrüfatçılığa keçmək məqsədəuyğundur. Torpaq sahibləri arasında torpaq yox, ondan götürülən məhsul bölünsə daha yaxşıdır. Artıq İsmayıllıda belə nümunələr var.

Sonra tədbiri FAO-nun tərəfdaşlıq və Əlaqələndirmə Ofisinin rəhbəri FAO-nun nümayəndəsi Mələk Çakmak aparıb.

Kənd təsərrüfatı nazirinin müavini Seyfəddin Talıbovun mövcud vəziyyətə əsaslanan çıxışı seminar iştirakçıları tərəfindən yüksək səviyyədə dəyərləndirilib.

Vyana Universitetinin İnkişaf Tədqiqatları Mərkəzinin əməkdaşı Həmid El Bilali "Dayanıqlı inkişaf üçün 2030-cu il gündəliyində ərzaq və kənd təsərrüfatı” mövzusunda çıxış edib. İştirakçı fermerlərə və iş adamlarına dəyərli məsləhətlər verib.

Azərbaycan Respublikası İqtisadiyyat nazirinin müavini Sevinc Həsənova FAO-nun iqtisadi qurumlarla əməkdaşlıq şəraitində gördüyü işlərin yüksək nəticələrindən danışıb.

Proqram, monitorinq və qiymətləndirmə üzrə mütəxəssis Natəvan Aslanovanın "FAO-nun Azərbaycanda DİM-lərin tətbiqinə dəstəyi” mövzusunda çıxışı dinlənilib.

Kənd Təsərrüfatı Nazirliyinin əməkdaşı Həsən Quliyev, İqtisadi və Sosial İnkişaf Mərkəzinin əməkdaşı Əhməd Əlili, İsmayıllı Dövlət Aqrar İnkişaf Mərkəzinin direktoru Həsən Həsənov, Sahibkarlar Təşkilatları Milli Konfederasiyasının hüquq şöbəsinin müdiri Xəqan Hümmətov və "Azza-aqro” MMC-nin şöbə müdiri Nicat Vəliməmmədov gündəlikdə olan mövzularla bağlı çıxış ediblər.

Seminar suallar cavablandırılmaqla yekunlaşıb.

Əli SƏLİMOV,

"Azərbaycan”