Hər il olduğu kimi, bu il də Aşura günündə Gəncədə qanvermə aksiyası təşkil olunmuşdur. Qana ehtiyacı olan xəstələrə yardım etmək məqsədilə "İmamzadə” ziyarətgahında təşkil olunmuş aksiyada yüzlərlə insan iştirak etmişdir.

Mərkəzi Qan Bankının Gəncə filialının 44 nəfərlik tibbi heyəti xüsusi qurulmuş çadırda donorlara yüksək səviyyədə xidmət göstərmək üçün əllərindən gələni əsirgəmirdilər. Burada 42 nəfərin eyni vaxtda qan verməsi üçün hər cür şərait yaradılmışdı. Məntəqə zəruri dərman və tibbi vasitələrlə də təmin edilmişdi. Aksiyada iştirak etmək istəyən şəxslərin əvvəlcə arterial təzyiqi və qanında olan hemoqlobinin miqdarı yoxlanılırdı. Sağlamlığında heç bir problemi olmayan və 18 yaşdan yuxarı insanlar növbə ilə qan verirdilər. Günün sonunda Gəncə və ətraf rayonlardan 300 nəfərdən çox insan fəallıqla iştirak edərək qan vermişdilər.

Gəncə şəhər Zülfü Hacıyev küçəsinin sakini İradə Mustafayeva qan verərək məntəqədən çıxarkən onu dedi ki, qan vermək insanın özü üçün də çox faydalıdır. Həm orqanizmi təzələnir, həm də kiminsə həyatını xilas etdiyi üçün məvi cəhətdən rahatlıq tapır.

Şəmkir rayon Çinarlı kənd sakini Telli Hacıyeva da qan verənlər arasında idi. O, donor olmağı özünün vətəndaşlıq borcu hesab edirdi. Söhbət zamanı Telli dedi ki, aksiya çox yaxşı təşkil edilib. Sanitar normalara diqqət edilir. Tibb işçiləri hər kəsə xüsusi qayğı ilə yanaşırlar. Mən də mənəvi borcumu yerinə yetirmək üçün qan verdim. Özümü çox yaxşı hiss edirəm.

Qeyd edək ki, tədarük olunan qan və qandan hazırlanan preparatlar hemofiliyalı və talassemiyalı xəstələrin müalicəsi üçün istifadə olunacaqdır. Hazırda Mərkəzi Qan Bankının Gəncə bölməsində qərb bölgəsi üzrə ümumilikdə 300-ə yaxın belə xəstə qeydiyyatdadır.

Sabir ƏLİYEV,

"Azərbaycan”