Azərbaycan Respublikasının Prezidenti İlham Əliyev 10 sentyabr 2018-ci il tarixdə İsmayıllı rayonunun İvanovka kənd Mədəniyyət sarayının əsaslı təmiri, zəruri inventar və avadanlıqlarla təchizatı üçün 2,5 milyon manat vəsait ayrılması barədə sərəncam imzalayıb.

İvanovkaya həmişə xüsusi qayğı ilə yanaşan ölkə rəhbərinin diqqət və qayğısına minnətdarlıqla cavab verən İvanovka sakinləri bu tarixi hadisəyə həsr olunmuş təntənəli mitinq keçiriblər. Mədəniyyət sarayı qarşısındakı tədbiri İvanovka İƏD üzrə nümayəndə İvan Prokofyev açıb. Kolxozun sədri Vasili Novoseltsev, tam orta məktəbin direktoru Polina Radayeva, Mədəniyyət sarayının direktoru Natalya Kolpakova çıxış edərək dövlət başçısına minnətdarlıqlarını bildiriblər.

Məktəbin direktoru qeyd edib ki, Prezident İlham Əliyev 2005-ci ildə İvanovkaya səfər edərkən demişdi: "Əvvəl Heydər Əliyev sizin qarantınız idi, indi mən sizin qarantınızam”. O, hər zaman dövlət qayğısı ilə əhatə olunduqlarını nəzərə çatdırıb. İvanovkada məktəb, ardınca 15 yerlik müasir xəstəxana tikilib, kəndə içməli su və asfalt yol çəkilib. Çoxdan arzusunda olduqları mədəniyyət sarayının təmiri və təchizatı üçün vəsait ayrılması İvanovka sakinlərini daha çox sevindirib.

Bildirilib ki, uzun illər təsərrüfata uğurla rəhbərlik etmiş Nikolay Nikitinin tikdirdiyi İvanovka mədəniyyət sarayı 1986-cı ildə istifadəyə verilib. Lakin indiyədək əsaslı təmir olunmayıb və təchizatı yenilənməyib.

Tədbirin sonunda kolxozun müşahidə şurasının sədri Olqa Jabina Prezidentə ünvanlanan müraciəti oxuyub. Ardınca isə "Slavyanoçka” folklor qrupu Azərbaycana və İvanovkaya həsr olunmuş mahnılar ifa ediblər.

Ə.SƏLİMOV,

"Azərbaycan”