Alternative content

21:04 23 Sentyabr 2018
ONLINE XƏBƏR LENTİ
FOTOXRONİKA
PAYIZ
BAŞ REDAKTORDAN

Hamımızın Azərbaycan adlı bir vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir. Müstəqilliyin çətin yolları ilə kövrək addımlarını atan anamız Azərbaycan övlad məhəbbətinə və köməyinə daim ehtiyac duyur. Onun Qarabağ adlı yarasını sağaltmaq, bütövlüyünü bərpa etmək üçün hamımız əl-ələ verməliyik!
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

Azərbaycan Qəzeti Rəsmi Dövlət Qəzeti, Baş redaktor Bəxtiyar SADIQOV Yeni tədqiqat: az miqdarda alkoqol da orqanizm üçün təhlükəlidir
Yeni tədqiqat: az miqdarda alkoqol da orqanizm üçün təhlükəlidir
ANA SƏHİFƏ / Səhiyyə
10:08 24.08.2018

Alkoqollu içkilərin insan orqanizminə təsiri ilə bağlı yeni tədqiqatın müəllifləri qəti nəticəyə gəliblər: spirtli içkilərin hər hansı dozası insan orqanizminə zərər verir və hökumətlər insanlara bu zərərli vərdişdən birdəfəlik çəkinməyi tövsiyə etməlidir.

AZƏRTAC “The Guardian” qəzetinə istinadla xəbər verir ki, bu qəti rəyin müəllifləri ABŞ-ın Vaşinqton Universitetinin tədqiqat qrupuna daxil olan alimlərdir. Aparılan geniş tədqiqatın “Lancet” tibb jurnalında dərc olunan nəticələrinə görə, 2016-cı ildə alkoqollu içkilər 2,8 milyon insanın ölümünə səbəb olub.

Tədqiqatın nəticələrinə görə, gündə 1-2 qədəh pivə, yaxud şərab içməyin sağlamlıq üçün təhlükəsiz olması barədə fikirlər də yanlışdır. “Elmi nöqteyi-nəzərdən sübut olundu ki, spirtli içkilərin təhlükəsiz dozası yoxdur”, -deyən tədqiqat müəllifləri bu yanaşma tərzinə qəti mövqelərini bildiriblər.

Alimlər ABŞ-ın Sağlamlığın Qiymətləndirilməsi İnstitutunun 1990-2016-cı illərdə dünyanın 195 ölkəsində apardığı tədqiqatların nəticələrindən də istifadə ediblər. Bu müddətdə aparılan 529 tədqiqat nəticəsində alkoqollu içkilərdən istifadə edən 28 milyon insanın sağlamlığının pozulması faktları qeydə alınıb. Gündə bir qədəh qırmızı şərabın ürək-damar və şəkərli diabet xəstəliklərinə faydalı olması barədə fikirlər də bu tədqiqat zamanı təkzib olunub. Hətta spirtli içkilərin onkoloji xəstəliyə tutulma ehtimalını artırması, xüsusilə qadınlarda döş xərçənginin yayılmasında mənfi rol oynadığı da müəyyən edilib. Belə ki, Britaniyada hər 13 onkoloji xəstəlikdən birinin alkoqol mənşəli olduğu üzə çıxıb. Gənclərdə isə vərəm xəstəliyinin böyük bir hissəsinin, habelə yol qəzaları və intiharların çoxunun spirtli içkilərlə əlaqəli olduğu məlum olub.

Tədqiqatlar onu da göstərib ki, dünyada hər üç nəfərdən biri – 2,4 milyard insan müəyyən fasilələrlə spirtli içkilərdən istifadə edib. Alkoqollu içki içənlərin dörddəbiri qadınlar, 39 faizi isə kişilərdir. Ən çox spirtli içki istifadəçiləri Danimarkadadır. Bu ölkədə qadınların 95,3 faizi, kişilərin isə 97,1 faizi alkoqollu içki içir. Ən az spirtli içki içilən ölkələr isə Pakistandır (0,8 faiz).

Tədqiqatın rəhbəri, professor Emmanuella Cakidounun sözlərinə görə, bəzi ölkələrdə alkoqollu içki istifadəçilərinin sürətlə artması sağlamlıq problemləri ilə yanaşı, iqtisadi və sosial çətinliklərə də səbəb ola bilər. “Hökumətlərin bu sahədə sərt nəzarət tədbirləri həyata keçirməsi həyati əhəmiyyət daşıyır. Bütün dünyanın bu cür tədbirlərə və alkoqoldan xilas olmaq üçün sağlamlıq proqramlarına ehtiyacı var. Bu tədbirlərə spirtli içkilər üzərində vergilərin artırılması, satış saatlarının məhdudlaşdırılması, reklamların qadağan edilməsi daxildir”, - deyə professor hökumətlərə tövsiyələrini açıqlayıb.