Kolumbiya - İngiltərə - 1:1 (əlavə vaxt)

Qollar: Yerri Mina, 90+3 - Harri Keyn, 57 (pen.)

Penaltilər seriyası: 3:4

Moskva. “Spartak” stadionu

Günün maraqlı qarşılaşması Kolumbiya və İngiltərə yığmaları arasında oldu. Kolumbiya millisi yeganə komandadır ki, bu mundiala məğlubiyyətlə başlasa da, 1/8 finala çıxa bilib. İlk oyunun 3-cü dəqiqəsində azlıqda qalmaları səbəbindən yaponlara uduzan (1:2) kolumbiyalılar sonra Polşa (3:0) və Seneqal (1:0) komandalarını məğlub etməyi bacarıblar. DÇ-2014-də 1/4 finala çıxaraq ən yüksək nailiyyətinə imza atan komandanın bu uğuru təkrarlaması asan olmayacaqdı.

Kolumbiyalılar topu orta xətdə daha çox saxlamaları ilə fərqlənsələr də, rəqibinin heyətində son matça kimi

5 qolla hazırda mundialın bombardiri olan Harri Keyn kimi futbolçu var. Mundialın yaşca ən gənc komandalarından olan ingiltərəlilər ikinci heyətlə belçikalılara məğlubiyyətdən əvvəl ardıcıl 4 oyunda qələbə qazanmaları ilə yadda qalıb.

ABŞ-lı referi Mark Qeyqerin idarə etdiyi görüşə daha fəal başlayan ingilislər Harri Keynin 57-ci dəqiqədə penaltidən vurduğu qolla hesabda irəli çıxdılar. Qoldan sonra tədricən topa daha çox sahib olmağa çalışan kolumbiyalılar pressinq tətbiq edərək İngiltərə komandasının oyun qurmasına çətinlik yaratdılar. Qurulan hücumlar, sağ və sol cinahlardan edilən sürətli ötürmələr görüşün son dəqiqəsində bəhrəsini verdi. Hamı İngiltərə futbolçularının 1/4 finala vəsiqə qazandığını düşündüyü bir vaxtda  Yerri Mina hesabı bərabərləşdirdi - 1:1.

Nəticədə əlavə edilən 30 dəqiqədə də qalib müəyyənləşmədi. Penaltilər seriyasında daha dəqiq olan İngiltərə komandası 4:3 hesabı ilə qalib gələrək dörddəbir finala yüksəldi.

Beləliklə, iyulun 3-də Rusiyada keçirilən futbol üzrə XXI dünya çempionatının 1/8 final mərhələsinə yekun vuruldu. Mundialın 1/4 final mərhələsinin görüşləri iyulun 6-7-də keçiriləcəkdir.

Elçin CƏFƏROV,

“Azərbaycan”