Prezident İlham Əliyev ilə görüşmək mənim üçün çox böyük şərəfdir. Azərbaycanda velosiped idmanının inkişafına, eləcə də Beynəlxalq Velosipedçilər İttifaqına (UCI) dövlət səviyyəsində verilən dəstək çox əhəmiyyətlidir. Ölkənizdə idmanın bütün növləri kimi, velosiped idmanının da inkişafına göstərilən yüksək diqqət və qayğıya görə Prezident İlham Əliyevə minnətdaram.

Bu sözləri iyunun 6-da Beynəlxalq Velosipedçilər İttifaqının prezidenti David Lappartyen AZƏRTAC-a müsahibəsində deyib.

Ölkəmizə səfərə gələrkən ilk növbədə Bakı Veloparkına baş çəkdiyini vurğulayan David Lappartyen bildirib: “Nəinki Veloparkın ərazisi, burada yaradılmış yüksək şərait, xoş atmosfer məndə çox böyük təəssürat oyatdı. Mən 2015-ci ildə ilk Avropa Oyunları zamanı burada olmuşam. O vaxtdan bu günədək trek yenidən qurulub, səviyyəsi artırılıb. Bu, bizi çox sevindirir. Bu il BMX üzrə dünya çempionatına 43 ölkədən 1500-dən çox idmançının iştirak etməsi bu idman tədbirinin uğurunun göstəricisidir. Biz dünya çempionatının yüksək səviyyədə təşkil olunduğunu müşahidə etdik. Məşqçilər, idmançılar və onların valideynləri də söhbətlərimizdə çempionatın yüksək səviyyədə təşkil edildiyini bildirirlər”.

Beynəlxalq Velosipedçilər İttifaqının prezidenti kimi 2017-ci ilin sentyabrında fəaliyyətə başladığını vurğulayan David Lappartyen bildirib: “UCI-nin prezidenti seçildikdən sonra bir sıra mühüm tədbirlər həyata keçirmişik. İlk növbədə, yerli federasiyalara dəstək göstərməyə çalışırıq. Əsas məqsədimiz bütün ölkələrdə velosiped idmanının inkişafına nail olmaqdır. Buna görə bütün ölkələri bu prosesə cəlb edəcəyik. Biz dopinqə və digər mənfi hallara qarşı amansız mübarizə aparmaqda davam edəcəyik. Əsas məqsədlərimizdən biri də velosiped idmanını əsrin idman növünə çevirməkdir. Görüləsi işimiz çoxdur. On gün sonra UCI-nin yüksək səviyyəli görüşü keçiriləcək. Orada 2019-2022-ci illərə aid fəaliyyət planını müzakirə edəcəyik”