13 May 2018 12:05
232
Mədəniyyət
A- A+

95 yaşın xatirələri...

 

Müsahibim çox danışmağı sevmir. Deyir ki, bu günlərdə 95 yaşım tamam olur. “Müharibənin ağrılarını, acılarını, ən çətin günlərini görmüşəm. Bizim nəsil o illəri dözümün hesabına yaşadı. O qədər güllə yaraları almışam ki...

Amma yaşamaq cəhdi məni bu günlərə qədər qorudu. Döyüş yolum 223-cü diviziyadan başlayıb. Düz Berlinə qədər ağır döyüş yolu keçmişəm. Bəzən sərt, soyuq meşələrdə gecələyirdik. Amma bircə niyyətimiz vardı: qalib gəlmək, düşmənə layiqli cavab vermək!

Hələ də o günləri xatırlayanda iradəmizə, inamımıza məəttəl qalıram. Müharibəyə Zərdabın kiçik bir kəndindən - Əlvənddən yollanmışam. Elə ən çox o yerlər üçün darıxırdım. Məni böyüdən, ərsəyə gətirən adamları tez-tez xatırlayırdım. Anamın göndərdiyi isti yun corabları alanda o qədər sevinirdim ki...

Yaxşı xatırlayıram, döyüşlərin birində qolumdan yaralanmışdım. Döyüş dostlarım məni çətinliklə də olsa, təhlükəsiz yerə çatdırdılar. Sarğı materiallarımız da tükənmişdi. Onda ağacların yarpaqlarından faydalanmalı olduq”.

Nemət Bayramov yaşının bu çağında həmin günləri bir kino lenti kimi gözlərinin önündən keçirir. Deyir ki,  doğrusu, bugünə qədər yaşamağıma ümidim az idi. “Hər gün o qədər təhlükə ilə üz-üzə qalırdıq ki... Bəzən hər dəqiqəmiz ölümə bərabər olurdu. Amma qətiyyən ruhdan düşmürdük. Əksinə, itkilərimizin əvəzini çıxmaq üçün yeni qüvvə ilə döyüşlərə gedirdik. Biz qələbəyə inanırdıq. İnanırdıq ki, düşmənin texniki imkanları nə qədər güclü olsa da, mənəvi dayaqları xeyli zəifdir. Bizdə olan birlik çox güclü idi.

Ən çox yadımda qalan Krım döyüşləridir. Müharibənin ən qaynar dövründə - 1943-1944-cü illərdə 423-cü batalyonun tərkibində vuruşurduq. Qara dənizdə o qədər çətin döyüş əməliyyatları keçirmişik ki... Belə əməliyyatların birində düşmənin böyük bir silah-sursat anbarını ələ keçirdik. Ölüm-dirim mübarizəsində yalnız irəliyə doğru gedirdik. Qara dənizdə döyüş gəmimiz bir neçə yerdən zədələnsə də, sona qədər mübarizəni dayandırmadıq. Ona görə də nəticə bizim xeyrimizə qurtardı”.

Nemət baba danışdıqca bir qədər kövrəlirdi. Geriyə boylanmaq, o illəri xatırlamaq nə qədər çətin olsa da, sorğularımı cavabsız qoymurdu.  “Vallah, ay oğul, o günləri xatırlamaq istəmirəm. Bəzən hər günü sonuncu döyüş əməliyyatı sanırdıq. Sağ qalmağımıza o qədər də ümidimiz yox idi. Amma bizi yaşadan böyük inam və ümid vardı. Bir də ki, içimizdə vətən sevgisi yaşayırdı...

Müharibədən sonra nələr qazanmışamsa, bütün bunlar Tanrı payı, halal qismətimdir. Bu gün yeddi övladın atası, 16 nəvənin babasıyam, nəticələrimin də sayı çoxdur. Onların hər biri ilə fəxr edir, öyünürəm. Xoş soraqlarını alanda o qədər sevinirəm ki... Çoxu əsgəri xidmətini başa çatdırıb. Hərəsi bir işin qulpundan yapışıb. Mən özüm də müharibədən sonra təhsil aldım. Ali təhsilli iqtisadçıyam. Uzun illər müxtəlif sahələrdə çalışmışam”.

Nemət baba deyir ki, məni gümrah, sağlam saxlayan övladlarımın xoş sorağı, qazandıqları uğurlardır. “Bir də ki, dövlətimizin bizə qədərincə göstərdiyi qayğıdır. Hazırda yüksək təqaüd alıram, müalicələrim dövlət hesabına aparılır. Dünyanın müxtəlif yerlərində istirahətdə olmuşam. Müharibədən sonra xoş günlərim çox olub. Bu gün müharibə veteranı kimi üstünlüklərim çoxdur. Hər yerdə bizə diqqət və qayğı göstərirlər”.

Nemət baba yeni nəslin onlara münasibətindən də razıdır. Tez-tez məktəblərə, bağçalara dəvət alır, müxtəlif tədbirlərdə iştirak edir. Bütün bunlar da ona mənəvi ruh verir. Deyir ki, uşaqların suallarına cavab verdikcə bir qədər gümrahlaşıram. Əslində günümün çoxunu onlara sərf edirəm...

“Məni gümrah saxlayan bir məşğuliyyətim də var. Yardımçı təsərrüfatımızda hər gün saatlarla çalışıram. Əkib-biçirəm, ağaclara, güllərə qulluq edirəm. Bu işdə nəvələrim də mənə yardımçı olur. Bəlkə də məni yaşadan belə əyləncələrdir.

Hər il eyni gündə - 9 mayda Böyük Vətən müharibəsində qələbəmizi qeyd etmək üçün yaşıdlarımla rayon mərkəzinə toplaşırıq. Bizə hörmətlə, nəvazişlə yanaşırlar. Qiymətli hədiyyələrlə mükafatlandırırlar. Hiss edirik ki, heç vaxt, heç vədə unudulmamışıq. Belə olanda yaşamaq da asanlaşır, sabaha güclü inam yaranır. Əminəm ki, biz bu gün üzləşdiyimiz təhlükəni də sovuşduracağıq. Erməni quldurlarının azğın niyyətləri qətiyyən baş tutmayacaq. Dövlətimizin, güclü ordumuzun qətiyyəti bizim qələbəmizə tam təminat yaradacaq. Onda həmin günü də qələbə bayramı kimi qeyd edəcək, bir-birimizə yeni uğurlaq arzulayacağıq...”

 

Bəşir ŞƏRİFLİ,

“Azərbaycan”

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video