Alternative content

02:20 22 Sentyabr 2018
ONLINE XƏBƏR LENTİ
FOTOXRONİKA
PAYIZ
BAŞ REDAKTORDAN

Hamımızın Azərbaycan adlı bir vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir. Müstəqilliyin çətin yolları ilə kövrək addımlarını atan anamız Azərbaycan övlad məhəbbətinə və köməyinə daim ehtiyac duyur. Onun Qarabağ adlı yarasını sağaltmaq, bütövlüyünü bərpa etmək üçün hamımız əl-ələ verməliyik!
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

Azərbaycan Qəzeti Rəsmi Dövlət Qəzeti, Baş redaktor Bəxtiyar SADIQOV Tikililərin park yerləri niyə boş qalır?
Tikililərin park yerləri niyə boş qalır?
ANA SƏHİFƏ / Oxucu məktubları
12:11 05.11.2017

 

Yollardakı sıxlığın bir səbəbi yaşayış binalarının, həmçinin kommersiya obyektlərinin layihə ilə nəzərdə tutulmuş avtomobil parklama  yerlərinin  istifadəyə verilməməsidir.

Binalar tikilir, mənzillər satılır, lakin illər ötsə də, bu park yerlərində inşaat işləri tamamlanmır, ya da  xidmət haqqının yüksək olması səbəbindən  sahə boş qalır. Tikinti şirkətləri layihənin bütünlüklə sona çatdırılmasına maraq göstərmirlər. Binaların altındakı  parklama sahələri təhlükəsizlik və havalandırma sistemləri ilə təchiz olunmalıdır. Bu da müəyyən məbləğdə xərc tələb edir. Sonradan  sahibkarların gözünə az görünən  gəlir gətirdiyindən  onlar bu işə  ciddi  maraq göstərmirlər. Beləcə, bir çox hallarda binaların  altındakı  park  yerləri  istifadəyə  yararsız  qalır. Sakinlər də avtomobillərini kiçik, onsuz da dar olan məhdud  sahəli həyətlərdə, yaxınlıqdakı  küçə  və yollarda saxlamaq məcburiyyətində qalırlar.

Təəssüf  ki, bəzi  tikililərin, ümumiyyətlə, layihə üzrə avtomobil park yeri olmur. Qazanc hərisliyi o qədər güc gəlir ki, bəzi sahibkarlar  və onlara bu şəraiti yaradanlar  kiçik bir yerdə bir neçə mərtəbəsi yerin altında, 5-6 mərtəbəsi də yuxarıda obyekt inşa edirlər. Məsələn, belə tikilidə  klinika açanda nəzərə almırlar ki, bir “ovuc” ərazisi olan yerə  sabah onlarca, bəzi hallarda yüzlərlə avtomobil yığılacaq. Onlar da haradasa  dayanmalı, durmalıdır.  Harada gəldi saxlayanda da  yollarda hərəkət məhdudlaşır, təhlükə artır və beləcə, birinin qazanmaq  eşqi  ictimai  problemlər  törədir.  Əslində, tikinti normativlərinə, memarlıq qaydalarına görə, belə hallar  yolverilməzdir. Amma reallıq bu tələblərə riayət edildiyini söyləməyə əsas vermir. Bu səbəbdən də  əksər  yeni tikililərin, küçələr boyu sıralanan obyektlərin, metrostansiyaların  birbaşa üstündə, ətrafında salınan ticarət “şəhərcik”lərinin həndəvərindən keçmək olmur.  Belə yerlərdə yaşayanların halını, gününü-güzəranını təsəvvür etmək də çətin deyil.

Maraqlıdır, illərdir haqqında danışılan, amma üzünü hələ də görə bilmədiyimiz  Bakının Baş Planında bu tikililər, memarlıq “inci”ləri də yer alıb, yaxud,  alacaq?  Unutmaq olmaz ki, biz bu gün təkcə öz dövrümüzün deyil, gələcək qarşısında da məsuluq. İnkişaf perspektivi nəzərə alınmasa,  bu gün şəhərsalmada yol verdiyimiz nöqsanlar  gələcək nəsillər üçün həlli müşkül problemə çevriləcəkdir. 

 

Elxan ELDAROĞLU,

Bakı  şəhər sakini