Əziz oğlum, əsgər  balam! Bilirəm,  ailəmizin yeganə kişisi olaraq bizi düşünüb  fikir çəkəcəksən. İlk vaxtlar darıxıb sıxılacaqsan. Amma gün keçdikcə  daha çox iradə toplayacaq, mətinləşəcəksən.

Evdə, məktəbdə nə qədər Vətən sevgisindən danışsaq da, bu məhəbbətin əslini  orada - hərbi  xidmətdə hiss edəcəksən! Əsgər oğlum, igid balam! “Əsgər”  kəlməsinin  altında böyük bir məna durur. Əsgərlik kişilk, vətəndaşlıq məktəbidir. Səni  bayrağımıza  sevgi ilə böyütdüm, oğlum! Yurda, torpağa, dövlətə  sevgi  aşıladım. Böyüdün, öz qəlbinin diktəsi ilə  otağında  Azərbaycan  bayrağını asdın. Əsgər olmaq, əldə silah Vətənə xidmət  etmək arzusu  ilə yaşadın! Lap kiçik yaşlarında “əsgər-əsgər” oynadığın yadındamı? “Marş irəli, Azəbaycan əsgəri” - deyə addımlardın həyətdə. Bir oyuncaq qılıncın da vardı. Bəzən gecələr əlində qılıncla başımızda durub “Rahat yatın,  mən qəhrəmanam, keşikdəyəm,  əjdahanı öldürəcəm,  düşmənlə savaşacam”- deyirdin.  Bax, oğlum, bu gün -  o gündür! Biz indi rahat yatır, sən bizim - xalqın  keşiyini çəkirsən.

Şübhəsiz, şanlı Azərbaycan bayrağını öpüb and içəndə Vətənin  dəyərini daha çox anlamısan. Bu bayrağın sənin müstəqilliyinin, gələcəyinin olduğunu daha dərindən hiss etmisən! Bu yurdun, bu Vətənin təhlükəsizliyinin sənin kimi oğulların, igidlərin əlində olduğunu da dərk etmisən! Vüqarınla, əzminlə vətənə borcunu ləyaqətlə ödəyəcəyinə əminəm!  Hər gün təlim keçəcək, qollarına, dizlərinə qüvvət yığacaq, hərbin sirlərinə yiyələnəcəksən! Ana qoynuna sığındığın, qoxusunu duyduğun qədər indi ruhən və cismən  ana torpağa daha yaxın olacaq, ətrini ciyərlərinə çəkəcəksən! Unutma, o torpaqda yüzlərlə, minlərlə  şəhidin qan izləri var! Onu da mütləq hiss edəcəksən. Doğmalarımızın qanı ilə suvarılmış bu torpağı yenidən dirçəltmək, işğalda olan hissəsini azad etmək,  qorumaq sizin borcunuzdur, oğul! “Hər şey Vətən üçün!” şüarı ilə addımlayarkən ananın bu məktubunu xatırla.  Unutma:  dünən evini, ailəni, ananı  qoruduğun kimi, bu gün dövlətini, torpağını, elini qorumalısan! Qorumalısan ki, evin də, elin də yaşasın!

Əziz oğlum! Uzun illər kimsəsizlərə də analıq etdim. Çoxları məni “Əsgər anası!” deyə çağırdı. Bu gün sayəndə həqiqətən də əsgər anasıyam! Səninlə fəxr edirəm, oğlum! Xidmətdə olduğun bu az müddətdə  hər dəfə komandirlərinin, əsgər yoldaşlarının  dilindən “Təşəkkür edirik, oğlunuz intizamlı, nümunəvi  əsgərdir!” - sözünü eşitməyim məni çox qürurlandırır! Belə davam et! Hər ay sənə bir məktub yazacam. 16-ci məktubda xidmətin sona çatmış olacaq.

Əziz balam! Yanına valideyni gələ bilməyən əsgərlər də olacaq. Onlara qardaş-sirdaş ol, dayaq  dur! Bütün əsgər və zabitlərimizi Allaha əmanət edirəm!

Vətən xidmətində uğurlarınız bol olsun!

Şərafət MUQUZOVA,

əsgər anası