“Azərbaycan” qəzetinin 15 may 2016-cı il tarixli nömrəsində 9-cu mikrorayon sakinləri adından “Bütün sərnişinlərin rahatlığı nəzərə alınmalıdır” başlığı altında oxucu məktubu dərc olunmuşdu. Məktubda mikrorayonun aşağı hissəsindəki son dayanacağa qədər 6 avtobus marşrutu işlədiyi halda, yuxarı əraziyə cəmi birinin qalxmasından bəhs edilmişdi. Bu səbəbdən sərnişinlərin mikrorayonun yuxarı hissəsinə piyada qalxmaq məcburiyyətində qaldığını vurğulayan müəllif vətəndaşların çəkdiyi əziyyətin nəzərə alınmasını, əvvəllər fəaliyyət göstərmiş 27 nömrəli  marşrutun  bərpasını, yaxud digər marşrut sxemlərinin yaşayış məntəqəsinin  yuxarısına qədər uzadılmasını istədiklərini bildirmişdi.

Azərbaycan Respublikasının Nazirlər Kabineti yanında Bakı Nəqliyyat Agentliyində bu müraciətə baxılıb, məsələ ilə bağlı redaksiyaya agentliyin baş direktoru Vüsal Kərimlinin imzası ilə aşağıdakı məzmunda məktub göndərilib:

“Bütün sərnişinlərin rahatlığı nəzərə alınmalıdır” sərlövhəli oxucu məktubuna Azərbaycan Respublikasının Nazirlər Kabineti yanında Bakı Nəqliyyat Agentliyində baxılmışdır.

Hazırda Bakı şəhərində nəqliyyat infrastrukturunun və şəhər nəqliyyatının işinin daha da yaxşılaşdırılması, o cümlədən ictimai nəqliyyatın tənzimlənməsi, sərnişindaşıma marşrutlarının optimallaşdırılması üçün müvafiq araşdırmalar aparılaraq marşrut şəbəkəsində təkmilləşdirilmə işləri həyata keçirilir.

Görüləcək işlər çərçivəsində 9-cu mikrorayonun yuxarı hissəsinə marşrut avtobuslarının hərəkət etməsi ilə bağlı müraciət müvafiq qaydada araşdırıldıqdan sonra məqsədəmüvafiq hesab edildiyi halda nəzərə alınacaqdır”.