Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Molekulyar Biologiya və Biotexnologiyalar İnstitutunda akademik Cəlal Əliyevin 90 illik yubileyi qeyd olunub

29 İyun 2018
İyunun 29-da Azərbaycan Milli Elmlər Akademiyasının (AMEA) Molekulyar Biologiya və Biotexnologiyalar İnstitutunda (MBBİ) görkəmli alim, akademik Cəlal Əliyevin anadan olmasının 90 illiyi münasibətilə tədbir keçirilib.

MBBİ-dən AZƏRTAC-a bildirilib ki, əvvəlcə tədbir iştirakçıları – bu elmi müəssisənin, Botanika İnstitutunun, Dendrologiya İnstitutunun, Kənd Təsərrüfatı Nazirliyinin Azərbaycan Elmi-Tədqiqat Əkinçilik İnstitutunun əməkdaşları və alimin tələbələri Fəxri xiyabanda görkəmli akademikin əziz xatirəsini yad edib, məzarı önünə əklillər və gül dəstələri qoyublar.

Tədbirdə AMEA-nın vitse-prezidenti, MBBİ-nin direktoru, akademik İradə Hüseynova Cəlal Əliyev məktəbinin yetirməsi olduğu üçün qürur hissi keçirdiyini bildirib. Müəlliminin Azərbaycan elmindəki misilsiz xidmətlərindən, müsbət insani keyfiyyətlərindən danışan İ.Hüseynova diqqətə çatdırıb ki, mərhum alim bir şəxsiyyət kimi tələbələrinə daim örnək olub. Azərbaycan elmi qarşısında müstəsna və təmənnasız xidmətlərinə görə akademik Cəlal Əliyev hələ sağlığında özünə əbədi abidə ucaldıb. Onun yaratdığı dünya səviyyəli müasir elmi məktəbin onlarla istedadlı yetirməsi bu gün Azərbaycanda və dünyanın ən nüfuzlu mərkəzlərində tədqiqatlar aparır, yeni elmi nailiyyətləri ilə respublikamızın, elmimizin adını ucaldırlar.

Sonda “Elmə həsr olunan ömür” sənədli filmi nümayiş etdirilib.