Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Bərdə: həkim briqadaları kəndlərdə əhalini tibbi müayinədən keçirirlər

14 Fevral 2018
Azərbaycan Prezidentinin tapşırığına uyğun olaraq fevralın 12-dən etibarən ölkəmizin hər yerində olduğu kimi, Bərdə rayonunda da əhalinin tibbi dispanserizasiyası uğurla həyata keçirilir.

Bərdə Rayon Mərkəzi Xəstəxanasının baş həkimi Rəna Mustafayeva AZƏRTAC-ın bölgə müxbirinə bildirib ki, aksiya xəstəliklərin erkən müəyyən olunması və vaxtında müalicəsi baxımından çox əhəmiyyətlidir. Sakinlər rayon mərkəzi xəstəxanasında, Müalicə Diaqnostika Mərkəzində, şəhər poliklinikasında və kəndlərdəki tibb məntəqələrində müayinə olunurlar. Bundan başqa yüksəkixtisaslı mütəxəssislərdən ibarət həkim briqadaları tərəfindən rayonun kəndlərində əhalinin tibbi müayinəsi həyata keçirilir.

Aksiyanın ilk üç günündə 1512 vətəndaş tibbi müayinədən keçirilib. 12 nəfər stasionar müalicəyə cəlb edilib, 5 nəfər isə müalicə üçün respublikamızın ixtisaslaşmış xəstəxanalarına göndərilib. Aşkara çıxarılan xəstəliklər üzrə müalicə kursları təyin edilir.

Prezident İlham Əliyevin Azərbaycanın hər vətəndaşının sağlamlığına diqqəti və qayğıkeş münasibəti sakinlər tərəfindən minnətdarlıqla qarşılanır. Poliklinikada müayinədən keçən rayon sakinləri İlham Mehdiyev və Nəzakət Məmmədova AZƏRTAC-ın bölgə müxbiri ilə söhbətlərində humanitar aksiyadan razı qaldıqlarını bildirib, vətəndaşların sağlamlıqlarının etibarlı şəkildə qorunması məqsədilə respublikamızda hər il keçirilən kütləvi tibbi müayinələri yüksək qiymətləndiriblər.