Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Uşaqlar üçün növbəti ekoloji laboratoriya təlimi təşkil olunub

02 Fevral 2018
 

IDEA İctimai Birliyi və “Sevimli bala” təşkilatının birgə həyata keçirdiyi “Uşaqlar üçün ekoloji laboratoriya” layihəsi çərçivəsində IDEA Resurs Mərkəzində bu ilin ilk laboratoriya təlimi keçirilib.

İctimai Birlikdən AZƏRTAC-a bildiriblər ki, 2018-ci ildə keçiriləcək təlimlərin BMT-nin 2030 Dayanıqlı İnkişaf Məqsədlərinə uyğun mövzularda təşkil edilməsi nəzərdə tutulub.

IDEA İctimai Birliyinin sıx əməkdaşlıq etdiyi BMT-nin İnkişaf Proqramından müstəqil ekspert Elana Səyidli yanvar laboratoriyasının xüsusi qonağı qismində çıxış edərək, BMT-nin Dayanıqlı inkişaf Məqsədləri ilə bağlı uşaqlara təqdimat keçirib.

Təlim zamanı gənc ekoloqlara iqlim dəyişikliyi və onun təsirlərinə qarşı mübarizə aparmağın yolları, qlobal istiləşmənin səbəbləri və nəticələri, istixana effekti və s. haqda geniş məlumat verilib. Həmçinin uşaqlar iqlim dəyişikliyi ilə bağlı planetimizdə baş verən dəyişiklikləri daha asan qavramaları üçün bir sıra laboratoriya sınaqlarının keçirilməsində iştirak ediblər.

Yanvar laboratoriyası uşaqlara maraqlı və əyləncəli gün bəxş etməklə yanaşı, Dayanıqlı İnkişaf Məqsədləri haqqında məlumatlı olmaları, həmçinin iqlim dəyişmələri və buna səbəb olan amillərlə tanış olmaları baxımından əlamətdar olub.

IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində təşkil olunan “Uşaqlar üçün ekoloji laboratoriya”da iştirakla bağlı IDEA İctimai Birliyi ilə (497-63-16) əlaqə saxlamaq xahiş olunur.