Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Vitaliy Kliçko: WBC Konvensiyasının Bakıda təşkili qeyri-adi hadisədir

02 Oktyabr 2017
İlk növbədə Azərbaycan Prezidenti İlham Əliyevə Ümumdünya Boks Şurası (WCB) Konvensiyasının Bakıda təşkilinə şərait yaratdığı üçün minnətdarlıq etmək istərdim. Bu versiyada dünyanın müxtəlif dahi boksçuları, o cümlədən, Məhəmməd Əli, Mayk Tayson, Lennoks Lüis vuruşub. Mənə də WBC versiyası üzrə dünya çempionu titulunu əldə etmək qismət olduğu üçün böyük qürur hissi keçirirəm. Çox yaxşı haldır ki, belə bir konvensiya Azərbaycan paytaxtında keçirilir. Təşkilati işlərdə dəstək olduğu üçün gənclər və idman naziri Azad Rəhimova da böyük təşəkkürlərimi bildirirəm. Konvensiyanın işinə uğurlar arzulayıram.

AZƏRTAC xəbər verir ki, bunu jurnalistlərə müsahibəsində Ukraynanın paytaxtı Kiyev şəhərinin meri Vitali Kliçko deyib. Məşhur boksçusu WBC Konvensiyasının Bakıda təşkilini qeyri-adi hadisə adlandırıb: "Çünki bu tədbir adətən, WBC versiyasında döyüşməyə namizədi olan ölkələrdə keçirilir. Ən nüfuzlu versiya üzrə Azərbaycanın çempionu yoxdur. Amma əminəm ki, belə inkişaf etmiş infrastruktur, idmana göstərilən diqqət sayəsində belə bir çempion ən yaxın vaxtlarda yetişəcək. Dünyanın bütün promouterləri Bakını, Azərbaycanı görmək, növbəti il dünya çempionu kəməri uğrunda döyüşün məkanını müzakirə etmək üçün bura gəliblər. Əminəm ki, bu konvensiya Azərbaycanda peşəkar boksun inkişafına təkan olacaq. Bilirik ki, Azərbaycanın həvəskar boksda ən yüksək nəticələr göstərmiş idmançıları var. İnanıram ki, yaxın vaxtlarda belə boksçular peşəkar rinqdə də ortaya çıxacaqlar".

Vitali Kliçko Azərbaycanın peşəkar boksda da yüksək nəticələr əldə etməyə qadir olduğunu vurğulayıb: "2011-ci ildə Azərbaycanda boks üzrə dünya çempionatı yüksək səviyyədə keçirildi. Üstəlik, Azərbaycanın bir neçə boksçusu yüksək nəticələr göstərdi. Hətta qardaşım Vladimir Kliçkonun peşəkar boksda rəqibi olmuş Entoni Coşua finalda Azərbaycan təmsilçisi Məhəmmədrəsul Məcidova uduzdu. Nəticədə Coşua yalnız gümüş mükafatçı ola bildi. Ənənələr var, bunu möhkəmləndirmək, inkişaf etdirmək lazımdır. Nelson Mandella idmanın dünyanı dəyişməyə qadir olduğunu deyib. Belə tədbirlərin Azərbaycanda təşkili çox xoş haldır".