Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

"AmCham": Strateji yol xəritələrinin monitorinqi ölkədə biznes mühitinin daha da yaxşılaşdırılmasına xidmət göstərəcək

14 Sentyabr 2017
Azərbaycanda Amerika Ticarət Palatası ("AmCham") Azərbaycan Prezidenti İlham Əliyevin 2016-cı il 6 dekabr tarixli Fərmanı ilə təsdiq edilmiş Azərbaycanın milli iqtisadiyyat perspektivi üzrə strateji yol xəritəsinin monitorinqinin aparılması və qiymətləndirmə hesabatlarının hazırlanması təşəbbüsünü dəstəkləyir.

"AmCham"dan AZƏRTAC-a bildiriblər ki, qurumun Azərbaycanda icraçı direktoru Natəvan Məmmədova milli iqtisadiyyat və iqtisadiyyatın əsas sektorları üzrə strateji yol xəritələrinin açıq monitorinqinin aparılması və ortaya çıxmış nəticələrinin, həmçinin bu istiqamətdə aparılan qiymətləndirmənin ictimaiyyətə təqdim olunmasının olduqca mütərəqqi hal olduğunu deyib. "AmCham" strateji yol xəritələrinin hazırlanmasında iştirak etmiş bir qurum olaraq hesab edir ki, həm yarım ildən bir, həm də illik təqdim olunacaq bu nəticələr strateji yol xəritələrində nəzərdə tutulmuş tədbirlərin vaxtında və effektiv icra edilməsinə rəvac verəcək. Palata aparılan monitorinq nəticələrinin mütəmadi olaraq öz üzvlərinə çatdırılmasında və tərtib edilmiş hesabatlar üzrə müzakirələrdə iştirak etməkdə maraqlıdır.

Monitorinq və qiymətləndirmə nəticələrini şərh edən Natəvan Məmmədova bildirib ki, strateji yol xəritələrində nəzərdə tutulan işlər üzrə qiymətləndirmənin aparılması yol xəritələrinin təsdiq edilməsindən sonra hesabat xarakterli həyata keçirilmiş ilk belə hal olaraq xüsusi əhəmiyyət kəsb edir və xəritələrin implementasiyasında nəzərə çarpacaq irəliləyişə səbəb olacaq.

"Strateji yol xəritələri üzrə belə bir monitorinq və qiymətləndirmə sisteminin qurulması açıq hökumət prinsipinə tam uyğundur və bu təşəbbüsün həyata keçirilməsi yol xəritələrinin reallaşması prosesində şəffaflıq, hesabatlılıq və səmərəliliyin təmin olunması baxımından olduqca təqdirəlayiq bir haldır. Monitorinqlər strateji yol xəritəsinin icrasına dair məlumatların yerli və beynəlxalq ictimaiyyətlə kommunikasiya olunmasına, həmçinin bu sahədə tələb olunan investisiyanın cəlb edilməsinə şərait yaradacaq ki, bu da bütövlükdə ölkədə biznes mühitinin daha da yaxşılaşdırılmasına xidmət göstərəcək", - deyə Natəvan Məmmədova əlavə edib.