Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

“İndoneziyada və Azərbaycanda multikulturalizm: müqayisəli araşdırma” mövzusunda seminar keçirilib

11 Sentyabr 2017
Sentyabrın 11-də İndoneziyanın Azərbaycandakı səfirliyi və Azərbaycan Dillər Universitetinin (ADU) birgə təşkilatçılığı ilə “İndoneziyada və Azərbaycanda multikulturalizm: müqayisəli araşdırma” mövzusunda seminar keçirilib.

AZƏRTAC xəbər verir ki, seminar Azərbaycanın və İndoneziyanın dövlət himnlərinin səsləndirilməsi ilə başlayıb.

Seminarda çıxış edən ADU-nun rektoru, AMEA-nın həqiqi üzvü, Əməkdar Elm Xadimi Kamal Abdulla deyib ki, Azərbaycanın və İndoneziyanın ortaq cəhətləri çoxdur. Bu cəhətlərin çoxluğu xüsusilə multikulturalizm ənənələrinə əsaslanır. Məlum olduğu kimi, Azərbaycan Prezidenti İlham Əliyev multikulturalizmi dövlət siyasəti elan edib. “Multikulturalizm Azərbaycan xalqının qədim tarixindən bu gününə qədər onun ən böyük ziyalılarının yaradıcılığından qırmızı xətlə keçən son dərəcə insansevər və dünyəvi dəyərlərə açıq olan mənəvi bir xəzinədir. Ulu öndər Heydər Əliyevin əsasını qoyduğu multikulturalizm xətti bu gün Prezident İlham Əliyev tərəfindən Azərbaycanın dövlət siyasəti kimi inkişaf etdirilir və bizim universitetimiz də bu inkişafa öz töhfəsini verir. İnanıram ki, universitetimizin potensialı Azərbaycan multikulturalizmi ideyalarını dünyanın bir çox ölkələrinə çatdırmağa, o cümlədən İndoneziyada davamlı, etibarlı bir dayaq nöqtəsi tapmağa imkan verəcək. Bu gün Azərbaycan Dillər Universitetində “Azərbaycan multikulturalizmi” adlı elmi-tədqiqat laboratoriyası yaradılıb. Azərbaycanda Bakı Beynəlxalq Multikulturalizm Mərkəzi fəaliyyət göstərir. Müxtəlif universitetlərimizdə “Azərbaycan multikulturalizmi” fənni tədris edilir. Eyni zamanda, dünyanın 15 universitetində, həmçinin İndoneziyada “Azərbaycan multikulturalizmi” fənni uğurla tədris edilir”, - deyə Kamal Abdulla diqqətə çatdırıb.

İndoneziyanın Azərbaycandakı səfiri Hüsnan Bəy Fanani ölkələrimiz arasında əlaqələrin inkişafından danışaraq Azərbaycanın zəngin multikultural və tolerant dəyərlərə sahib olduğunu bildirib. O qeyd edib ki, Azərbaycan İndoneziya üçün önəmli ölkədir. İndoneziya ilə Azərbaycan arasında iqtisadi, siyasi və mədəni sahələrdə əlaqələrin getdikcə genişləndiyini deyən səfir əməkdaşlığın daha da möhkəmlənməsi üçün səylərin artırılmasının vacibliyini vurğulayıb. Diplomat həm İndoneziyada, həm də Azərbaycanda multikultural, tolerant dəyərlərə önəm verildiyini vurğulayıb.

Seminarda Banqdunq Dövlət İslam Universitetinin rektoru professor M.Mahdmud M.Si “İndoneziya və Azərbaycan multikulturalizmi qlobal model kimi”, Bakı Beynəlxalq Multikulturalizm Mərkəzinin icraçı direktoru əvəzi Rəvan Həsənov “Azərbaycan multikulturalizminin siyasi-hüquqi əsasları”, Cokyakarta Sinan Kalicaqa Dövlət İslam Universitetinin əməkdaşı Munavar Ahmad “Azərbaycan və İndoneziyada multikulturalizmin möhkəmlənməsində ictimai kapitalın rolu”, Azərbaycan Dillər Universitetinin ümumi dilçilik kafedrasının professoru Həbib Zərbəliyev “Azərbaycan və İndoneziyada multikulturalizm: kontekst və çağırışlar”, Beynəlxalq Multikulturalizm Mərkəzinin şöbə müdiri fəlsəfə doktoru Rəşad İlyasov isə “Azərbaycan multikulturalizminin ədəbi-bədii və fəlsəfi qaynaqları” mövzularında çıxış ediblər.