Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

“Şahdəniz-2” platformalarının ikinci dayaq bloku dənizə yola salınıb

16 Mart 2017
“Şahdəniz Mərhələ 2” platformalarının ikinci dayaq bloku dənizə yola salınıb.

Şahdəniz konsorsiumundan AZƏRTAC-a bildirilib ki, Yaşayış Blokları və Texnoloji Təchizat (YBTT) platformasının dayaq bloku qrafiki qabaqlayaraq martın 15-də Heydər Əliyev adına Bakı Dərin Özüllər Zavodundan (BDÖZ) Xəzər dənizindəki “Şahdəniz” müqavilə sahəsinə yola salınıb. Dayaq bloku konstruksiyasının daşınması, suya endirilməsi, yerləşdirilməsi, payaların üzərinə quraşdırılması və yekun tamamlanma işlərinin hava şəraitindən asılı olaraq təxminən 75 gün davam edəcəyi gözlənilir.

Dayaq blokunun tikintisi qrafiki qabaqlayaraq bu il fevralın 20-də tamamlanıb və sonra uğurla BDÖZ-dəki yanalma körpüsündə STB-1 daşıma barjına yüklənib. “BOS Shelf”, “Star Gulf” və “Saipem” konsorsiumu tərəfindən inşa edilmiş bu dayaq bloku yerli tikinti-quraşdırma infrastrukturundan və qurğularından istifadə olunmaqla bütövlüklə ölkə daxilində BDÖZ-də inşa edilib. Tikinti işlərinə subpodratçılar və ixtisaslaşmış təchizatçılar daxil olmaqla 2 min nəfər işçi cəlb edilmişdi. Bu işçi qüvvəsinin təxminən 90 faizi Azərbaycan vətəndaşları olub.

BP-nin “Şahdəniz-2” layihələri üzrə vitse-prezidenti Yuan Dramond deyib: “İkinci dayaq blokunun dənizə yola salınması cari il üçün planlaşdırılmış ilk mühüm işimizdir və biz qrafiki qabaqlamaqla buna nail olmağımızdan çox məmnunuq. 2017-ci il həm BP şirkəti üçün, həm də artıq təxminən 90 faizi tamamlanmış olan “Şahdəniz-2” layihəsi üçün əhəmiyyətli bir ildir. Biz bu il layihə üzrə bir sıra mühüm işlərin tamamlanmasını planlaşdırırıq. BP-nin Azərbaycandakı fəaliyyətinin 25-ci ildönümünü qeyd etdiyimiz bu il biz planlaşdırdığımız bütün işləri qrafikə uyğun yerinə yetirməklə böyük uğura imza atmaq niyyətindəyik”.

“Bununla bağlı mən bu nəhəng layihənin irəliləyişinə göstərdikləri dəstəyə və əməkdaşlığa görə SOCAR-a və tərəfdaşlarımıza dərin minnətdarlığımı bildirirəm. Eləcə də, bu mərhələnin qrafikdən öncə tamamlanmasına nail olmaq üçün öz zəhmətini əsirgəməmiş BP-nin, podratçıların və subpodratçıların bütün əməkdaşlarına minnətdarlığımı bildirmək istəyirəm. Dayaq blokunun 22 aylıq tikinti müddətində BP-nin texniki təhlükəsizlik standartlarına tam əməl etdiklərinə görə “BOS Shelf”, “Star Gulf” və “Saipem” konsorsiumuna xüsusilə təşəkkür etmək istəyirəm. Bu, əməyin təhlükəsizliyi baxımından böyük nailiyyətdir və mən əminəm ki, dənizdəki quraşdırma işləri də əməyin təhlükəsizliyinə və keyfiyyətə eyni dərəcədə əməl edilməklə həyata keçiriləcək”, - deyə Y.Dramond əlavə edib.

İkinci dayaq blokunun çəkisi təxminən 12 min 84 ton, hündürlüyü isə 105 metrdir. Dayaq blokunun 31 J-formalı borusu, 7 xidməti kessonu və 3 J-formalı boru kessonu var. Dayaq bloku suyun 95 metr dərinliyində quraşdırılacaq.