Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Qab-qacaq orqanizm üçün zərərli ola bilər

13 Fevral 2017
ABŞ-ın Aşlend Universitetindən olan alimlər bildiriblər ki, alüminium qab-qacaq insanın fiziki sağlamlığına pis təsir edir.

AZƏRTAC “medikforum.ru” saytına istinadla xəbər verir ki, amerikalı mütəxəssislər on ölkədə alüminium qab-qacağı yoxlayaraq müəyyən ediblər ki, bu cür qabların tərkibində orqanizmə pis təsir göstərən metal qarışıq tez-tez olur. Ekspertlər qabların tərkibində təhlükəli maddələrin olmasını onların müxtəlif metal tullantılarından hazırlanması ilə əlaqələndiriblər.

Tədqiqatda yazılıb: “Xörək bişirmək üçün istifadə edilən alüminium qabların tərkibində olan arsen və kadmium yeməyə qarışıb. Nümunələrin üçdəbirindən çoxu xörəyə qarışan qurğuşunun təsiri baxımından orqanizm üçün xüsusi real təhlükə doğurub. Alüminium qablardakı qarışığın səviyyəsi Dünya Səhiyyə Təşkilatının normasını altı dəfə ötüb”.

Mütəxəssislərin fikrincə, alüminium qab-qacaq ürək-damar patologiyası ilə əlaqəlidir. Habelə uşaqların bu qablardan mütəmadi istifadə etməsi ilə onlarda IQ səviyyəsinin azalması arasında bağlılıq var.