Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Gənc nəslin dəstəklənməsinə sevinirik

27 Noyabr 2016
 

Ölkəmizdə gənc nəslin intellektual səviyyəsinin artırılması, dünyagörüşünün genişləndirilməsi istiqamətində atılan addımlar sistemli xarakter daşıyır. Təhsildənkənar yeni layihələr - “Ölkəmizi tanıyaq” devizi altında keçirilən tur-aksiyalar da məhz bu qəbildəndir.

Oğlum  Səyyad Şıxəli Qurbanov adına Zaqatala şəhər 3 saylı tam orta məktəbin 11-ci sinfində oxuyur. Bu günlərdə  dərsdən çox yüksək əhvali-ruhuyyədə qayıdıb dedi ki, onları Lənkəran, Masallı və Astara rayonlarına gəzməyə aparacaqlar.

Mən də çox sevindim. Övladımın təhsildə qazandığı uğurlara və buna göstərilən  dövlət qayğısına görə qürrələndim. Axı Səyyad indiyədək bir neçə bilik yarışmasının, respublika əhəmiyyətli fənn olimpiadalarının qalibi olmuşdu. Elə bu səbəbdən - təhsildə fərqləndiyinə görə də tur-aksiyada rayonumuzu təmsil edəcək 40 şagirddən biri seçilmişdi.

Artıq səfərə gedib, qayıdıblar da. Uşaqların sevinci yerə-göyə sığmır. Təəssüratlarını bölüşür, gördüklərindən həvəslə danışırlar. Hiss olunur ki, onlara göstərilən diqqətdən çox məmnundurlar. Biz valideynlər də razıyıq. Gənc nəslin dəstəklənməsi bizi çox sevindirir: övladlarımıza göstərilən bu dövlət qayğısı  onların kamil vətəndaş kimi  formalaşmasında müsbət rol oynayır.

 

Sahib YUSUBOV,

Zaqatala şəhər sakini