Dekabrın 30-da Dünya Azərbaycanlılarının Həmrəyliyi Günü və Yeni il bayramı ərəfəsində Babək rayonu ərazisində yerləşən hərbi hissənin yeni əsgər yataqxanası, tədris hissəsi və məişət kompleksi istifadəyə verilmişdir.
Bu münasibətlə keçirilən mərasimdə Naxçıvan Qarnizonunun rəisi, general-leytenant Kərəm Mustafayev Naxçıvan MR Ali Məclisinin Sədri Vasif Talıbova raport verdikdən sonra çıxış edərək muxtar respublikada aparılan ordu quruculuğundan danışmışdır.
Ali Məclisin Sədri Vasif Talıbov çıxış edərək demişdir ki, muxtar respublikada yaranmış ənənəyə uyğun olaraq əziz bayramlarımızı - Dünya Azərbaycanlılarının Həmrəyliyi Gününü və Yeni ili sizinlə - ordu birləşmələrinin nümayəndələri ilə birlikdə qeyd edirik. Bu ənənənin əsası ümummilli lider Heydər Əliyev tərəfindən qoyulmuşdur.
Sədr xatırlatmışdır ki, ümummilli liderimiz 1991-ci il sentyabrın 7-də muxtar respublikada ilk milli ordu hissələrinin yaradılmasına başlamış, 1992-ci il oktyabrın 9-da isə Naxçıvanda ilk hərbi parad keçirilmişdir. Bu paradda Azərbaycan dilində ilk hərbi əmr və raport səslənmişdir. Paraddakı çıxışında xalqımızın böyük oğlu demişdir ki, bu hissələr lazımi gücə malikdir və Naxçıvan torpaqlarını müdafiə etməyə qadirdir. Ümummilli liderimizin müəyyənləşdirdiyi ordunun hərtərəfli qayğı ilə əhatə olunması siyasəti ölkə Prezidenti, Silahlı Qüvvələrin Ali Baş Komandanı İlham Əliyev tərəfindən davam və inkişaf etdirildiyi kimi, "xalq-ordu birliyi" ənənəsi də Azərbaycan xalqı tərəfindən yaşadılır.
Xalq və ordu birliyinin nəticəsidir ki, 2009-cu ilin ötən dövrü ərzində Naxçıvan Muxtar Respublikası ərazisindəki hərbi hissələrdə aparılan iş və tədbirlər üçün 1 milyon 452 min manatdan artıq vəsait sərf olunmuş, 371 min manatlıq ərzaq və digər tələbat malları alınıb verilmişdir. Ordu birləşmələrinin döyüş hazırlığının artırılması üçün tədbirlər görülmüş, hərbi hissələrdə quruculuq işləri davam etdirilmiş, 2009-cu ildə Culfa rayonundakı hərbi hissədə zabit yaşayış-məişət kompleksi, Sədərək rayonunun Heydərabad qəsəbəsində hərbçi ailələri üçün 10 mənzilli 5 yaşayış binası, Şərur rayonunun Havuş kəndində hərbçi ailəsi üçün ev, Şahbuz rayonundakı hərbi hissədə zabit ailələri üçün 8 mənzilli yaşayış binası, əsgər məişət yaşayış kompleksi, Şərur və Şahbuz rayonlarındakı hərbi hissələr üçün bölük mərkəzi binaları, Naxçıvan şəhərindəki hərbi hissədə çörək zavodu və əşya anbarı istifadəyə verilmişdir.
V.Talıbov vurğulamışdır ki, Dünya Azərbaycanlılarının Həmrəyliyi Gününün bir mahiyyəti də bundan ibarətdir ki, daxildə həmrəylik yaratmadan xarici ölkələrdə yaşayan həmvətənlərimizlə həmrəylik yaratmaq mümkün deyil. Daxili həmrəyliyin əsas ağırlıq mərkəzi isə "xalq-ordu birliyi"ndən keçir. Prezident, Silahlı Qüvvələrin Ali Baş Komandanı İlham Əliyev Naxçıvan Muxtar Respublikasına səfəri zamanı burada aparılan quruculuq işlərini yüksək qiymətləndirmişdir.
Ali Məclisin Sədri mərasim iştirakçılarını bayramlar münasibətilə təbrik etmiş, xoş bayram ovqatı arzulamışdır.
Sonra hərbi xidmətdə fərqlənmiş bir qrup zabit, gizir, çavuş və əsgərlər qiymətli hədiyyələrlə mükafatlandırılmışlar.
Zabit Hikmət Qazıyev və əsgər Şamxal Məmmədov şəxsi heyətə göstərilən diqqət və qayğıya görə minnətdarlıqlarını bildirmişlər.
Açılışı bildirən lent kəsildikdən sonra hərbi hissəyə baxış olmuşdur.
AzərTAc